Siglir tar il cuntegn

Header

cuntegn

TriOnline I fa clic!

A partir da l’avrigl datti ina premiera tar RTR: Il team online existent vegn cumplettà cun in producent u ina producenta che surpiglia analog a las collegas da audio, video ed on demand la responsabladad publicistica per rtr.ch.

L'ultim temp han surtut Globi, Iris, Edith e Schorsch procurà per las lingias grassas tar la lavur online. Els quatter èn bain buns gidanters digitals – directivas publicisticas èn dentant ad els uschè lungas sco ladas e dapli clics na genereschan els era betg. U formulà auter: Ils ultims onns èn noss instruments tecnics per tgirar la pagina d'internet sa sviluppads stediamain, uss suonda il proxim pass cun dapli forzas e cuntegn.

Selina, Nadja e Gion Gieri han tranter auter l’incumbensa da garantir la qualitad schurnalistica da tut ils products online, metter/midar titels, leads ed elements da structura en artitgels ubain er planisar e realisar atgnas istorgias online.
Autur: Flavio Bundi Schefredactur RTR

La purschida digitala dad RTR crescha fermamain e cuntanscha adina dapli public. Quai munta ch’i vegn er adina pli pretensius, saja quai da vender uschè bain sco pussaivel tut noss products, en il dretg lieu, il dretg mument, da guardar che tut vesa or bain e betg il davos che tut saja correct. E quai cun tegnair la survista dad emissiuns pli lungas en furma da audio e video fin tar l’annunzia da rapiment, l’accident da traffic u l’ultima decisiun da la regenza. Adina cun la finamira ch'il public survegn servì tut sin in clic.

Tge faschain nus?

Analog als producents audio, video ed on demand èn producents online responsabels per ils products ed il team. Tranter auter èn quai incumbensas sco:

  • Curatar rtr.ch (incl. audioteca ed a lunga vista era PlayRTR ed ulteriuras landingpages)
  • Planisar e coordinar las lavurs aifer il team online
  • Represchentar la redacziun online en sesidas/projects
  • Far recepziun d'artitgels online
  • Organisar dossiers (p.ex. votaziuns, elecziuns)
  • Esser persuna da contact per dumondas u tips (en il mintgadi ubain tar concepts)
  • Sviluppar novas furmas e nov cuntegn per rtr.ch
La foto mussa il trio online
Legenda: Nadja, Selina e Gion Gieri partan la funcziun sco producent online. RTR grafica

Tge sa mida?

Na, tut na sa mida betg! Redacturas e redacturs audio, video ed on demand scrivan vinavant artitgels tar lur contribuziuns ed emissiuns. Infurmaziuns supplementaras ubain fotos gugent vinavant trametter cun in mail. Il team online fa sco fin qua la redacziun finala e publitgescha ils cuntegns.

«Aber tge stos jau scriver en il shortlead, quant lung dastga in citat esser e tge legenda dovra ina foto?» Talas dumondas vegnan era bainbaud respundidas - sin in clic cun in concept publicistic per rtr.ch. Sco Flavio Bundi ha gia scrit en ses mail, sto quel anc vegnir approvà e serva lura sco mussavia per nus tuttas e tuts durant lavurs per la pagina d’internet.

Co cuntanscher nus?

Avrir la box Serrar la box
  • cun in mail sin multimedia@rtr.ch
  • fisicamain en l'ala Montalin (ina part dal team en homeoffice)
  • producentA è quella persuna ch'è violetta en il plan da lavur

Ed anc insatge resta: Il team online lavura 365 dis l'onn, durant fins d'emna e dis da festa cun servetschs reducids.

Online 1 Online 2 Online 3 ProducentA
Glindesdi 05:30 – 15:00 10:30 – 20:00 08:00 – 17:30 08:00 – 17:30
Mardi 05:30 – 15:00 10:30 – 20:00 08:00 – 17:30 08:00 – 17:30
Mesemna 05:30 – 15:00 10:30 – 20:00 08:00 – 17:30 08:00 – 17:30
Gievgia 05:30 – 15:00 10:30 – 20:00 08:00 – 17:30 08:00 – 17:30
Venderdi 05:30 – 15:00 10:30 – 20:00 08:00 – 17:30 08:00 – 17:30
Sonda 07:00 – 16:30 10:30 – 20:00
Dumengia 09:30 – 19:00

Nus e noss team ans legrain sin questa nova sfida e dain tut per pussibilitar ina anc meglra purschida dad RTR en la rait. Pertge er noss public chlichescha adina pli gugent.

TriOnline

TriOnline

Avrir la boxa da profil Serrar la boxa da profil
  • Selina resta sper producenta online (25%) vinavant producenta audio e reportra
  • Gion Gieri resta sper producent online (25%) vinavant producent audio e producent Minisguard
  • Nadja lavura sper producenta online (50%) sco redactura, tranter auter sco correspundenta dal Cussegl grond

Artitgels legids il pli savens