Il traffic da persunas, il segment principal – spetga la Viafier retica per il 2021 entradas lev sur quellas dal 2020. Dentant resta il resultat anc adina cleramain sut l’onn extraordinari 2019, cun in minus da circa 30%. Grazia als pajaments extraordinaris pervi da la pandemia da corona, saja da spetgar tar il traffic da persunas cun in resultat equilibrà, scriva la Viafier retica.
Gudogns cun autos e cun martganzia
Cun la fin d’october 2021 ha la Viafier retica transportà 13.1% dapli vehichels tras il tunnel dal Vereina, cumpareglià cun ils emprims 10 mais da l’onn avant. E cun il traffic intensiv ch’èn sco usità da spetgar sur ils dis da festa, spetga l’interpresa per l’onn da fatschenta 2021 cun in gudogn pitschen.
Era in lev plus pudessi dar tenor la communicaziun tar il traffic da rauba. Sco il stan da la fin d’october mussa, èn las cifras praticamain tuttina sco la medema perioda dal 2020.
La modernisaziun cuntinuescha
La Viafier retica è vi da modernisar e renovar tar las spartas infrastructura e traffic. E las fitg autas investiziuns ed il tact da mes’ura ch’è planisà, pretendia d’augmentar il dumber da persunal per radund 40 plazzas. Ils meds finanzials perquai sajan sin buna via da vegnir da la Confederaziun e dal chantun, scriva la Viafier retica.
