Stan actual da las vias:
- Serrè per l'entir enviern è il pass dal Spleia
- Serrà per motivs da segirezza: Ils pass Alpsu, Flüela, Forcola di Livigno ed Umbrail
- Naiv hai sin ils pass Lucmagn, Alvra, Güglia, Malögia, Bernina ed il Fuorn. Plinavant sin las vias principalas da Tavanasa vers ensi en Surselva, en Val Müstair, en l'Engiadin'Ota e da Vinadi a Samignun.
Sin il tschancun tranter Küblis e Claustra na curseschan il mument era nagins trens. Raschun è in disturbi da la lingia electrica. Igl è da quintar cun restards e trens che crondan or.
Blers n'eran betg pronts per l'emprima naiv
Mardi ha la polizia survegnì passa 20 annunzias pervi da collisiuns d'autos. Persunas n'èn dentant betg vegnidas blessadas pli ferm. Per part hai era gì accidents cun autos ch'avevan anc si pneus da stad u che quels na vegnevan simplamain betg pli davent. Er disturbis tar las lingias da tren avevi dà.
Situaziun sa calma proxims dis
Anc fin mezdi naivi en Grischun. Suenter sa calma la situaziun en la muntogna. Per part datti vers saira lura er fasas suleglivas. Suenter duess quai lura esser stà per il mument cun naiv. Ils proxims dis metta SRF Meto aura pulit sulegliva.