Las sorts da glatsch las pli popularas insumma èn ils classichers sco vaniglia, stracciatella, tschigulatta u frajas. La schelta da glatsch è dentant bunamain infinita e per part era scurrila, sco per exempel il gust dad octopus, da schambun, da hot dog u glatsch cun tissi da mamushi dal Giapun.
Ses origin ha il glatsch en la China. En l'Europa era en l'antica il sorbet er gia enconuschent. Il glatsch cun bastunet è vegnì inventà per schabetg, e l'American Frank Epperson vala sco l'inventader. El era producent da limunada, ed haveva senza vulair laschà en il liber in magiel cun limunada ed in tschadun. Il proxim di era la limunada schelada quasi tar glatsch d'aua. Uschia è il 1923 naschì il glatsch cun bastunet.
Ina rucla glatsch ha circa 120 calorias. Per brischar las calorias dad ina rucla glatsch, pon ins per exempel schubregiar fanestras u insumma far lavurs da tegnair chasa durant ina mes'ura, nudar u currer in quart d'ura, ubain far ina spassegiada dad ina mes'ura.
