In crutsch blau en il profil duai mussar ch'ins è verifitgà. Il crutsch vi dal crutsch blau per Instagram e Facebook: el custa. Tranter 10 e 20 dollars el mais per utilisader. Vitiers vi da pajar ston ins porscher a Meta ina fotografia da sia carta d'identitad.
Percunter empermetta Meta d'evitar ch'insatgi engola l'identitad. Il concern vul intercurir e bloccar profils fallads per quellas persunas che pajan per il crutsch blau. En pli hajan ellas access tar in agen servetsch da clientas e clients.
Funcziuns da basa betg pertutgadas
Per persunas betg verifitgadas resta tut sco ch'igl è. Tenor emprimas infurmaziuns pon las persunas verifitgadas dentant avair dapli visibilitad. Ed ellas han para «funcziuns exclusivas», la «pussaivladad da s'exprimer en in a maniera unica».
En il mument stat quest servetsch er be a disposiziun a persunas en Nova Zelanda ed en Australia. Il plan è lura d'introducir il model en il Stadis unids en las proximas emnas. Sco ch'i guarda ora per auters pajais sco la Svizra n'è betg enconuschent en il mument.
Ina moda per generar entradas
La svieuta da Meta è crudada per 4% l'ultim quartal. Las entradas tras reclama dal concern èn idas enavos. Perquai tschertga il concern novas vias da generar entradas. Els n'èn er betg ils emprims che pretendan daners d'utilisaders ed utilisadras. Tar Youtube datti gia in model per pajar e Twitter ha gia introducì la verificaziun cun il crutsch blau.
Il success è dentant intschert. Tenor retschertgas dal magazin online «The information» sajan be 0,2% da las utilisadras ed ils utilisaders da Twitter pronts da pajar.
