Sin WasHabIch.ch pon ins chargiar si la diagnosa ed in team or da medias u students da medicina translateschan quella da lur lingua professiunala en ina lingua chapibla er per laics e laicas sco nus. Quest servetsch è gratuit. Ils traducturs e las traducturas fan quai sco uffizi d'onur ed els ed ellas vegnan scoladas en translatar en ina lingua enclegentaivla.
Tge è in eritem diffus da la pel mucosa?
In bun exempel, che la traductura Selina Robers ha fatg en in'intervista cun SRF: vus survegnis la diagnosa «Diffuses Schleimhauterythem» u «in eritem diffus da la pel mucosa», sch'il medi u la media fiss rumantscha.
Suenter che vus chargiais questa diagnosa sin washabich.ch, survegnis vus la resposta: vossa pel mucosa dal stumi è encotschnida, la pel n'è betg be cotschna en in lieu, ma sur tut la surfatscha. Quai è bler pli chapibel che la diagnosa professiunala.
Tge che questa diagnosa munta, na din ils translaturs e las translaturas betg er sch'ellas èn medias. Cun quai na remplazza la pagina betg la visita tar il medi.
Cun ina chapientscha da la diagnosa èsi dentant bler pli simpel da far dumondas u discutar in problem cun il medi. La Federaziun dals medis las a medias svizras beneventa per quai er quest servetsch: el promova ina buna communicaziun tranter pazients e las medias.
Protecziun da datas
Las diagnosas vegnan chargiadas si en maniera anonimisada. Ils unics detagls persunals necessaris per la translaziun èn l'annada ed il sex. Quellas infurmaziuns èn relevantas per ina diagnosa. E per ils traducturs e las traducturas vela er l'obligaziun da discreziun sco adina en la medischina. Cun quai è la protecziun da datas en general avant maun.
Ma natiralmain èsi er en quest cas impurtant d'adina esser precaut cun las datas ch'ins tradescha. Gist sche sa tracta d'infurmaziun delicatas.
