Oz èn mo pli sis da 10 persunas anc commembers e commembras da las grondas cuminanzas cristianas en Svizra, quai mussan las cifras actualas da l'Uffizi federal da statistica. Cunzunt la cuminanza evangelica sto supportar ina gronda digren da commembers.
En il rom da la seria «Il Grischun en 100 onns» da RTR dumonda Vita e cretta: Datti insumma anc las grondas baselgias cristianas, la Baselgia catolic-romana e la Baselgia evangelic-refurmada, en 100 onns? E sche gea, co pudessan quellas esser organisadas? E co pudessan ellas surviver?
Questa giada stat la Baselgia refurmada en il center. Duas persunas che sa fatschentan intensivamain e da maniera professiunala cun la Baselgia refurmada ristgan da far prognosas, formuleschan hipotesas e palaisan in u l'auter giavisch per il futur da lur baselgia: Anja Felix-Candrian, preditganta refurmada che viva a Sagogn e Michel Müller, preditgant e president dal cussegl-baselgia dals refurmads en il chantun da Turitg. El sa fatschenta gia dapi onns cun l'avegnir da la Baselgia refurmada.
