Il fil cotschen tematic da questa emissiun è l'illustraziun musicala da quai ch'il cristianissem numna ils «set ultims pleds da Cristus vi da la crusch». Questas curtas construcziuns da chattar en ils evangelis, vegnan attribuidas a Cristus ubain a ses conturn.
Era sch'i n'è betg da prender questas construcziuns sco «protocol» da quai ch'è propi capità (la finala na dastgavan confamigliars ed amis betg assister ad ina crucificaziun), valan quests «pleds» sco ultims messadis da Cristus a l'umanitad e tras ils tschientaners han els inspirà diversas ovras d'art e da musica.
Nus tadlain melodias ch'illustreschan la dolur, la desperaziun, ma era la speranza dal crucifitgà e da quels e quellas che l'han accumpagnà en ses ultims muments.
