21.12.2020644 guardà

Controvers spezial: Co vinavant en il Grischun?

En in «Controvers spezial» han ils cussegliers guvernativs Marcus Caduff, Peter Peyer e Jon Domenic Parolini dà pled e fatg.

Il minister da sandad Peter Peyer ha accentuà ch’il Grischun na veglia betg far concurrenza cun auter chantuns cura ch’i va per vaccinar la populaziun. Il chantun preparia tut sin il start dals 4 da schaner 2021. Tge ch’il virus mutà da la Gronda Bretagna munta per il Grischun, ha el anc betg pudì declerar. El haja gì in prim telefon cun cusseglier federal Alain Berset e saja en contact cun las autoritads da lieus cun blers giasts britannics, sco per exempel Claustra. Marcus Caduff ha giustifitgà la decisiun da laschar avert territoris da skis en Grischun: «Uschia pudain reparter ils giast ed evitar fullas en ils vitgs. Pertge la glieud vegn en mintga cas tar nus a far vacanzas.» Ed il minister d’economia ha calculà ch’i mancass dad uss fin ils 22 da schaner 2021 ina svieuta da 900 milliuns francs sch’ins serrass tut ils manaschis. Il minister d’educaziun Jon Domenic Parolini è sa dustà cunter pretensiuns da prolungar las vacanzas da scola suenter Bumaun. La taskforce scientifica da Covid-19 da la Confederaziun cusseglia explicit da far instrucziun da preschientscha. La scola saja numnadamain betg mo in lieu d’emprender, mabain era il lieu social, uschia Parolini.

Dapli da Controvers

Ultimas episodas