«Coordinar meglier tranter Confederaziun e chantuns»

Suenter dus mais «lockdown» tiran ils cussegliers guvernativs Marcus Caduff (PCD) e Peter Peyer (PS) bilantscha. Ed els van perina: La coordinaziun tranter Confederaziun ed ils chantuns avess pudì esser megliera. Omadus cussegliers guvernativs han concedì che la crisa da corona saja ina sfida. Forsa hajan els perfin sutstimà il svilup al cumenzament da la crisa. En ina crisa sco tar il coronavirus - la pli gronda dapi la Segunda Guerra mundiala - vegnia il federalissem en Svizra als cunfins, uschia il minister da sanadad Peter Peyer. El differenziescha dentant: Sin livel dal fatg, per exempel tranter ils medis chantunals, haja il barat funcziunà fitg bain. Sin livel politic saja el dentant pli critic sche la collavuraziun haja propi funcziunà bain. Quai saja segir anc d'analisar anc en detagl. Marcus Caduff numna surtut la communicaziun ina sfida, cunquai che la populaziun en las valladas dal sid hajan savens gì l'impressiun che Cuira na fetschia nagut. La regenza perencunter haja era magari stuì spetgar sin decisiuns da Berna e silsuenter communitgar a curta vista tge che las mesiras muntian per il Grischun.