Il HCD ha pudì mussar ina reacziun suenter la stretga terrada encunter ils Bernais en l’emprim duel da pre-playoff (3:4 prolungaziun). Principal durant l’emprim terz èn ils Grischuns stads pli activs. En la 9avla minuta èsi era reussì al HCD dad ir en avantatg, quai grazia ad Aaron Palushaj.
A partir dal segund terz han ils Bernais auzà il tempo ed adina gì dapli dal gieu, er perquai ch'els han pudì giugar pliras giadas en powerplay. Ma tgi che na fa betg ils gols survegn els, uschia in vegl proverbi. Per la decisiun ha la finala Benjamin Baumgartner procurà cun dus gols en las davosas minutas.
Ch’igl è reussì da batter il SCB dastga il HCD però er engraziar al goli Sandro Aeschlimann ch’ha persvadì durant 60 minutas e mussà bain inqual parada spectaculara.
Finalissima a Tavau
Grazia a questa victoria spetga dumengia saira a las 19:45 uras il gieu decisiv tranter il HCD ed il SCB. Il victur da quest gieu frunta en ils playoffs da quartfinal sin l’EV Zug, l’equipa da la Svizra Centrala ch’ha dominà la qualificaziun e vala sco grond favurit sin il titel da campiun svizzer. Per l’equipa che perda quest terz duel è la stagiun a fin.
Renato Tosio e la fischa SCB-HCD
Il Grischun ch'ha terminà avant 20 onns sia carriera da profi è stà in dals megliers golis che la Svizra ha gì insacura. Durant ses 14 onns en il gol dals Bernais è Renato Tosio vegnì quatter giadas campiun svizzer ed è mutà ad ina legenda. Ses cor batta anc oz per il hockey. El haja adina gì gugent duels tranter clubs da tradiziun. Quel tranter Berna e Tavau è in da quels. Spezial en memoria restian ils gieus ch'ins haja battì il HCD en lur stadion a Tavau. I haja però er dà auters. Renato Tosio, ch'è oz manager da golf a Domat, sa regorda. Ed el guarda era sin la fischa actuala e na crai betg che la seria giaja a fin gia questa saira. Tavau sco er Berna sajan en questa stagiun adina puspè stads per terra e puspè stads si. Ils hockeyans da Tavau vegnian a dar questa saira 150%. Il squitsch en quest nov modus cun ina seria curta saja dentant enorm.