En sia ultima cursa da la cuppa mundiala al Holmenkollen en la vischinanza dad Oslo en Norvegia, è Dario Cologna vegnì 9avel sur ils 50 kilometers stil classic. En la penultima runda è il Jauer crudà, ha dentant tuttina pudì cuntinuar la cursa e la finala mussà ina ferma prestaziun a questa cursa che vala sco in dals gronds classichers insumma. Cologna ha a la fin pers bun ina minuta sin il victur Norvegiais Martin Lowstrom Nyenget ch'ha triumfà per l'emprima giada en ina cursa da la cuppa mundiala.
Nyenget ha battì en il sprint final ses dus cumpatriots Sjur Röthe e Didrik Tönseth. Il podest è uschia stà cumplainamain en mauns norvegiais. Sut ils top 30 è er anc classà Jonas Baumann sco 23avel cun in retard da passa quatter minutas.
En tut ha Cologna absolvì 285 cursas da la cuppa mundiala. L’autra dumengia fa el anc part al Maraton da skis engiadinais. Sia ultima partenza è planisada al campiunadi svizzer la fin mars a Sparenmoos en la vischinanza da Zweisimmen en la Part Sura Bernaisa.
