Siglir tar il cuntegn

Header

cuntegn

94avla Cuppa Spengler Organisaziun da la Cuppa Spengler sin buna via

L’organisaziun da la Cuppa Spengler ha orientà davart il stan da las preparativas sis emnas avant il turnier da renum mundial. A Tavau èn ins pront per la Cuppa Spengler.

Il Club da hockey da Tavau ed Ambri-Piotta, il champiun da record Team Canada, dentant era l’equipa da classa svedaisa Frölunda, Sparta Prag e KalPa Kuopio da la Finlanda èn questa giada da la partida. Suenter la pausa sfurzada l’onn passà è ils participants da la Cuppa Spengler sin il glatsch da vaglia.

Plaschair n'han ils organisaturs da la Cuppa Spengler dentant betg mo vi da las equipas e lur giugaders da hockey che vegnan a dar tut per far la festa da Silvester cun la trofea da la Cuppa Spengler enta maun, dentant era ch'il turnier po avair lieu cun public. Sa basond sin in concept da segirezza che prevesa era las reglas da 3G pon ils gieus avair lieu cun public, quai ch'è essenzial per ils organisaturs. Gieus da la Cuppa Spengler senza public na van betg, ed il Club da hockey da Tavau senza Cuppa Spengler na va er betg.

audio
Marc Gianola davart la preparaziun da la Cuppa Spengler 2021
aus Sport ed actualitad vom 14.11.2021.
abspielen. Laufzeit 4 minutas 31 Sekunden.

Cuppa Spengler essenzial per il HCD

Anc in onn senza il turnier, ch'è ina basa d’existenza fitg impurtanta per il HCD, fiss gia stà precar. Quai di il president dal comité d’organisaziun da la Cuppa Spengler, Marc Gianola. Perquai èsi uss tant pli bel ch'il turnier po avair lieu e che visitadras e visitaders da las partidas da hockey vesan il nov stadion da hockey a Tavau. Il stadion è vegnì renovà durant ils ultims trais onns e n'era anc betg accessibel als fans da la Cuppa Spengler. Uss san quels giudair hockey da classa sin il glatsch, e blera istorgia davart il club da tradiziun che festivescha quest onn ses tschientavel anniversari enturn il glatsch.

Entrar en zona da la Cuppa Spengler cun certificat da Covid

Per segirar ina festa da hockey il meglier pussaivel en quest temp da pandemia vala la regla da 3G per tgi che vul entrar en la zona da la Cuppa Spengler. Enturn il stadion vegni a dar sco tar il Forum d’economia mundial a Tavau ina zona nua ch'ins po entrar mo cun certificat. Quel segira lura era l’access a la halla da glatsch. Per quels fans che n'èn betg vaccinads u guarids dal virus porscha il Club da hockey da Tavau la pussaivladad da far in test.

RTR actualitad 17:00

Artitgels legids il pli savens

Scrollar a sanestra Scrollar a dretga