Durant la midada da l'onn, l'emprima giada da 2023/2024, planisescha Oberstdorf in'occurrenza da sigl cun skis. Sco Florian Stern, in schef dal comité d'organisaziun d'Oberstdorf declera a SRF, na saja uschia organisatoric e logistic betg pussaivel da manar atras il Tour de ski.
Il lieu en la Germania vul esser in center nordic ed uschia resguardar tut las disciplinas respectivas. Da la logistica ed era pervi da l'occupaziun cun aspectaturs fetschia pli bler senn da manar atras da Bumaun sigl cun skis da las dunnas e pli tard la cuppa mundiala da passlung.
Nua ch'il Tour de ski ha lieu 2024 n'è anc betg enconuschent
Per Doris Kallen, la coordinatura da la cuppa mundiala da passlung tar la FIS, sto il Tour de ski cuntegnair insatge spezial. Ins po adattar las cursas a las cundiziuns, la finamira è dentant da porscher ina cuntrada interessanta ed era avair aspectaturas ed aspectaturs sper la loipa.
Nua che tuttas cursas han lieu l'onn proxim n'è anc betg decidì. Segir è ch'i vegn a dar las emprimas cursas a Tavau. Ins vul tegnair l'occurrenza en l'Europa Centrala, l'idea generala è da manar atras pliras cursas entaifer paucs dis. Era èsi planisà da puspè porscher cursas dad a fin b, ma quellas èn pli grevas d'organisar ed era pli charas che cursas circularas en in stadion. Avant ch'ils lieus n'èn betg fixads numna la FIS era nagins candidats.
