Siglir tar il cuntegn

Header

cuntegn

Alex Fiva La via enavos suenter blessura

Empè da pudair defender ses titel da campiun mundial en il skicross ha Alex Fiva gì in auter cumbat. Avant in onn ha el stgarpà ils lioms dal schanugl ed ha manchentà l'entira stagiun. Il Grischun ha duvrà pazienza e bleras uras terapia. Ed in curt mument era gì il patratg da terminar sia carriera.

Ualti precis avant in onn (9-12-2022) è Alex Fiva sa blessà tar la cursa da skicross da la cuppa mundiala en Val Thorens. Diagnosa: Stgarpà ils lioms dal schanugl sanester. Per il campiun mundial e vicecampiun olimpic da l'onn 2021 è quai stà l'emprima gronda blessura en sia lunga carriera, abstrahà d'inqual problem cun il dies. Empè da sia missiun da vulair defender il titel da campiun mundial ha ina lunga fasa da reabilitaziun cumenzà cun terapia intensiva. Alex Fiva, ch'ha entant 37 onns, raquinta ch'el haja gist al cumenzament gì curt il patratg da terminar sia carriera da profi. Però chalar uschia, n'ha el betg vulì. Ed ha lavurà vi da ses comeback.

audio
Alex Fiva e sia via enavos suenter la blessura
ord Actualitad dals 07.12.2023. Maletg: RTR
laschar ir. Durada: 2 minutas 55 Secundas.

Nova stagiun senza finamiras

Alex Fiva ha pudì trenar bain ils ultims mais ed era pudì ir cun l'equipa svizra da skicross en il camp da trenament en il Chile. Uschia ch'el è pront per la nova stagiun che cumenza precis là, nua ch'el è sa blessà l'onn passà, en Val Thorens, en Frantscha. I dovria segir pliras cursas per vesair nua ch'el stettia, forsa perfin l'entira stagiun. Il pli impurtant saja da puspè survegnir confidenza. Alex Fiva metta perquai era naginas finamiras per sia stagiun da comeback e ses return en il ravugl dals megliers skicrossists dal mund. La nova stagiun da la cuppa mundiala cumenza ils 7-12-2023 en Val Thorens (FRA).

Cursas cuppa mundiala en Svizra

Avrir la box Serrar la box
  • 12-12-2023: Arosa
  • 28-01-2024: San Murezzan
  • 16-03-2024: Veysonnaz

RTR actualitad 08:00

Artitgels legids il pli savens