I saja grondius ch'ella haja pudì sa participar ed igl haja fatg bler plaschair dad ir a la partenza davant uschè in culissa gigantica el stadion a Eugene, uschia Annik Kälin. E sin quella tribuna mundiala ha la heptatleta da 22 onns briglià. La premiera al campiunadi mundial d'atletica leva cun l'elita è grategiada tras a tras.
Ch'jau hai pudì furnir uschè ina prestaziun ad in campiunadi mundial, uschè constant e ch'igl ha bastì a la fin per tants puncts sin in sisavel plaz è natiralmain incredibel.
En pliras da las 7 disciplinas ha ella realisà u è stada datier da records persunals. Avant l'ultima disciplina, ils 800 meters currer, era Annik Kälin perfin sin il 5avel plaz intermediar. Malgrà ch'ella è currida ils 800m uschè svelt sco nagin'autra heptatleta svizra avant, mancan a la fin 95 puncts sin quest 5avel plaz.
Las prestaziuns da Annik Kälin
| Disciplina | Prestaziun | Puncts |
| Cursa d'obstachels (100m) | 13,17 secundas | 1'099 |
| Sigl en aut | 1,74 meters | 903 |
| Stuschar la culla | 13,71 meters | 799 |
| Currer (200 m) | 24,05 secundas | 976 |
| Sigl en lung | 6,56 meters | 1'027 |
| Tir da lantscha | 48,25 meters | 826 |
| Currer (800 m) | 2:17,49 minutas | 858 |
| Total | 6'464 |
Gia Suenter l'emprim di e las emprimas quatter da las total set disciplinas dal heptatlon era ella sin posiziun otg, aveva recaltgà 3'754 puncts. Quai eran 38 puncts dapli che tar ses record svizzer che Annik Kälin ha realisà questa primavaira al meeting a Grossetto. Quai gist tar ses comeback suenter ina blessura pli lunga vi dal dies.
Annik Kälin da Grüsch ha mussà ils ultims mais ch'ella è en furma. L'avrigl tar il meeting a Grossetto ha la giuvna da 22 onns persvas cun in nov record svizzer da 6'398 puncts. Tant pli che sia furma constat e ses dies, ch'ha adina puspè mudregià ella, tegn. Uschia era ella 100% pronta per attatgar.
Wiliam Reais n'ha nagina schanza
Per il Grischun William Reais è il campiunadi mundial d'atletica leva a fin suenter la cursa da qualificaziun. Sur ils 200 meters è il sprinter da Cuira stà senza schanza. Ses temp da 20,71 secundas è lunsch davent da quai, ch'el curriva anc l'onn passà.
Ils ultims mais ha William Reais gì da sbatter cun blessuras vi dal pè ed il chalun. Ses focus è uss il campiunadi europeic da l'avust a Minca.
