Siglir tar il cuntegn

Header

video
Tops, flops e la medaglia da Ehammer sco highlight
Or da Sport-Clip dals 24.07.2022.
laschar ir. Durada: 2 minutas 32 Secundas.
cuntegn

Campiunadi mundial Eugene Ina medaglia e pliras bunas rangaziuns – il facit svizzer

Grazia ad in ferm Simon Ehammer returna la delegaziun cun ina medaglia dal campiunadi mundial da l’atletica leva ad Eugene en ils Stadis Unids. L’atlet da l’Appenzell Dadora ha fatg bronz en il siglir lung.

La delegaziun svizra cun 25 atletas ed atlets ha dentant era cuntanschì set rangaziuns tranter ils top 8. Quai n’hai anc mai dà tar campiunadis mundials. Ord questa vista è la Svizra la naziun numer 12 da l’Europa.

Atletas cuntentas

Il davos di dal campiunadi mundial da l’atletica leva a Eugene n'han las Svizras sco spetgà gì nagina schanza da sa qualifitgar per il final da la cursa d’obstachels sur 100 meters. Ditaji Kambundji ha realisà en 12,70 secundas ses meglier temp persunal. E Noemi Zbären è currida ses meglier temp da la stagiun en 12,94 secundas.

Realisà in nov record mundial ha la Nigeriana Tobi Amusan en il mezfinal. L’atleta da 24 onns ha meglierà il record mundial per 8 tschientavels sin 12,12 secundas. En il final è Amusan lura currida ad aur.

audio
Noemi Zbären è cuntenta cun sia cursa ad Eugene
ord RTR Audio dals 25.07.2022.
laschar ir. Durada: 10 Secundas.

Staffetta cun bun temp

La staffetta da las dunnas sur 4x400 meters ha mussà ina ferma prestaziun en il final. Silke Lemmens, Julia Niederberger, Annina Fahr e Yasmin Giger han realisà cun 3’27”81 lur meglier temp da la stagiun. Aur sur 4x400 meters han gudagnà tant tar las dunnas sco er tar ils umens mintgamai las staffettas dals Stadis Unids.

Staffetta senza arbajas

I n'ha dà nagina medaglia svizra en il final da la staffetta da 4x100 meters. Géraldine Frey, Mujinga Kambundji, Salomé Kora ed Ajla Del Ponte han stuì sa cuntentar cun il 7avel plaz cun in temp da 42,81 secundas. Gudagnà il final da 4x100 meters han las Americanas, segundas èn vegnidas las Jamaicanas e bronz han fatg las Tudestgas.

video
Be rang 7 per la staffetta da sprint svizra
Or da Sport-Clip dals 24.07.2022.
laschar ir. Durada: 1 minuta 18 Secundas.

En la staffetta sur 4x400 meters è la squadra svizra sa qualifitgada per il final. Silke Lemmens, Julia Niederberger, Annina Fahr e Yasmin Giger pon cumbatter per ina medaglia il glindisdi.

Lore Hoffmann ha manchentà il final sur 800 meters

La curridra vallesana Lore Hoffmann ha manchentà per pauc da sa qualifitgar per il final dals 800 meters. Cun 1 minuta e 59,88 secundas è ella currida per l'emprima giada questa stagiun sut duas minutas. La finala han manchentà 28 tschientavels.

Kambundji vegn 8avla sur 200 meters

Mujinga Kambundji è vegnida otgavla ed uschia davosa en il final sur 200 meters. Tuttina è la Bernaisa da 30 onns cuntenta. Gudagnà la cursa ha Shericka Jackson da la Giamaica en 21,45 secundas. Quai è il segund meglier temp sur questa distanza insumma. Pli sperta è fin uss be currida l’Americana Florence Griffith-Joyner il 1988 als gieus olimpics a Seoul. Quai per 11 tschientavels.

video
Kamundji: «Fiss gugent currida in zic pli spert, ma i è okay»
Or da Sport-Clip dals 22.07.2022.
laschar ir. Durada: 1 minuta 52 Secundas.

Yasmin Giger ha cleramain manchentà il final sur 400 meters

Yasmin Giger ha cleramain manchentà il final da la cursa d’obstachels sur 400 meters. En 56,31 secundas è la Songagliaisa da 22 onns vegnida davosa en ses percurs. Las battarias sajan stadas vidas oz. Tuttina saja ella fitg cuntenta d'insumma esser sa qualifitgada per ils mezfinals, uschia Giger.

video
Giger è out en il mezfinal
Or da Sport-Clip dals 21.07.2022.
laschar ir. Durada: 1 minuta 2 Secundas.

Kambundji vegn 5avla sur 100 meters

Mujinga Kambundji ha mussà ina ferma prestaziun en il final sur 100 meters. La Bernaisa è vegnida tschintgavla en 10,91 secundas. Gia avant in onn als gieus olimpics a Tokio ha ella briglià sco sisavla. Gudagnà la cursa ha Shelly-Ann Fraser-Pryce da la Giamaica. Tar ils umens ha Jason Joseph manchentà cleramain il final sur ils 110 meters obstachels. Per el è la concurrenza stada a fin suenter ils mezfinals.

video
La cursa da final dals 100 meters sprint
Or da Sport-Clip dals 18.07.2022.
laschar ir. Durada: 1 minuta 15 Secundas.

Simon Ehammer gudogna bronz en il sigl en lung

video
Simon Ehammer siglia tar bronz
Or da Sport-Clip dals 17.07.2022.
laschar ir. Durada: 53 Secundas.

L’Appenzellais da 22 onns è siglì 8,16 meters tar sia segunda emprova. Gudagnà la concurrenza ha il Chinais Jianan Wang avant il campiun olimpic da la Grezia, Miltiadis Tentoglou.

15 onns suenter Viktor Röthlin

I sa tracta da l’emprima medaglia al campiunadi mundial per la Svizra – e l’emprima per ils atlets svizzers dapi 15 onns suenter che Viktor Röthlin ha medemamain gudagnà bronz en il maraton ad Osaka en il Giapun il 2007.

RTR novitads 06:00

Artitgels legids il pli savens

Scrollar a sanestra Scrollar a dretga