La giugadra da tennis svizra Viktorija Golubic cuntanscha per l'emprima giada la segunda runda da l'Australian Open. Quai tar sia otgavla participaziun al turnier. La Svizra ha gudagnà la partida da l'emprima runda cunter la Russa Veronika Kudermetowa en trais sets cun 7:6, 1:6 e 6:1. En la segunda runda frunta Golubic sin Katerina Siniakova da la Tschechia.
Wawrinka cun main fortuna
Per il giugader da tennis svizzer Stan Wawrinka è l'Australian Open a Melbourne a fin strusch ch'el ha cumenzà. Il Romand ha pers la partida da l'emprima runda cunter il numer 20 dal mund franzos Adrian Mannarino en tschintg sets cun 4:6, 6:3, 7:5, 3:6 e 0:6. La partida ha cuzzà trais uras e mesa. A la fin ha mancà a Wawrinka ch'ha entant 38 onns la cundiziun. Sco gia l'onn passà n'è uschia nagin giugader svizzer sa qualifitgà per la segunda runda da l'emprim turnier da Grand Slam da l'onn.
