Siglir tar il cuntegn

Header

audio
Discurs cun ils dus chapitanis Sandro Orlik (Trun/Rabius) e Dino Blumenthal (Lumnezia)
Or da Sport ed actualitad dals 10.10.2021.
laschar ir. Durada: 08:07 minutas.
cuntegn

Ballape regiunal 3. liga Trun/Rabius gudogna suveran cunter Lumnezia

Il derbi sursilvan en la 3. liga da ballape è per ina giada stà ina clera chaussa. Il CB Trun/Rabius ha battì a chasa il CB Lumnezia gist cun 5:0. Il gieu ha gia cumenzà optimal per l'equipa da la Cadi. Suenter strusch in quart d'ura manava Trun/Rabius numnadamain gia cun 3:0.

Il CB Trun/Rabius n'ha laschà nagina schanza als Lumnezians. Suenter il 4:0 curt avant la pausa è il gieu stà decidì. Il 5:0 curt avant la fin dal gieu ha sulettamain anc midà in zic cosmetica.

audio
Trun/Rabius dat ina lecziun a Lumnezia – rapport da gieu
03:12 min, Sport ed actualitad dals 10.10.2021.
laschar ir. Durada: 03:12 minutas.

Il CB Trun/Rabius ha cunquai er pudì mussar ina reacziun suenter trais terradas en seria en il campiunadi da 3. liga (2:3 Glaruna / 1:2 Surses / 2:8 Eschenbach).

Per Lumnezia èsi perencunter gia stà la 6avla terrada en il 7avel gieu da campiunadi. Cun be in sulet punct (1:1 Surses) restan ils Lumnezians a la cua da la tabella. Trun/Rabius da l'auter maun ha cun da nov 9 puncts pudì far in pass enavant sin l'otgavel plaz da la tabella. Uschia ha Trun/Rabius er puspè ina reserva da 6 puncts sin ina plazza da relegaziun.

Clera terrada per Surses

Stuì magunar la quarta terrada en il 7avel gieu da campiunadi ha il CB Surses ch'ha pers a chasa encunter Bogn Ragaz, il nov leader da la tabella, cun 1:4. Surses resta sin il 10avel plaz da la tabella cun ina reserva da 4 punts sin il stritg ed uschia sin ina plazza da relegaziun en la 4. liga.

Proxima terrada per Cuira 97

Il meglier club grischun, il Club da ballape da Cuira 97 ha pers sia partida en la 2. liga interregiunala encunter il FC Red Star Turitg cun 2:3 ed uschia gia stuì magunar la 6avla terrada en l'otgavel gieu da campiunadi. En la tabella sa chatta l'equipa da la chapitala grischuna uss gist anc sur il stritg cun ina reserva da be in punct sin ina plazza da relegaziun.

USSI gudogna sut il nov trenader

Paucs dis suenter la relaschada dal trenader Mate Lekishvili ha l'emprima equipa da l'US Schluein Glion chattà la via enavos al success en la 2. liga regiunala. L'USSI ha gudagnà a chasa encunter il FC St. Margrethen cun 3:2, quai sut la batgetta dal nov trenader Corsin Cavegn. Ils Sursilvans manavan da pausa cun 2:0. L'equipa dal chantun Son Gagl ha dentant pudì reagir ed egualisar il gieu fin la 60avla minuta. Per la decisiun ha Serafin Bundi procurà cun il 3:2 en la davosa minuta. Malgrà questa victoria resta l'US Schluein Glion sut il stritg da la tabella cun 5 puncts ord 7 gieus da campiunadi.

Ina dira terrada ha perencunter il FC Domat stuì magunar. Ils Grischuns han pers ordaifer encunter il FC Winkeln cun 0:1. Il sulet gol per l'equipa dal chantun Son Gagl è crudà gia en la 16avla minuta. Domat sa chatta da nov sin l'otgavel plaz da la tabella cun in sulet punct reserva sin ina plazza da relegaziun.

Actualitad 17:00 uras

Artitgels legids il pli savens

Scrollar a sanestra Scrollar a dretga