Siglir tar il cuntegn

Header

cuntegn

Mate Lekishvili sto ir US Schluein Glion spedescha trenader

L'Uniun sportiva Schluein Glion ed il trenader da l'emprima equipa, Mate Lekishvili, van vias separadas e quai per immediat. L'ultima terrada da 0:7 encunter Domat è stada ina da memia.

purtret dal trenader.
Legenda: Il trenader Mate Lekishvili sto bandunar l'US Schluein Glion e quai per immediat. MAD, Uniun sportiva Schluein Glion

Sis gieus, dus puncts, incassà 24 gols, fatg be tschintg ed en la tabella sin l'ultim plaz. Massa pauc per la meglra equipa da ballape da la Surselva. Avant l'ultim gieu da a fin d'emna ch'ils da Schluein Glion han pers gist cun 0:7 encunter Domat, eran ils responsabels sesids ensemen cun trenader Lekishvili e fatg cler ch'ins spetgia dapli. Mess tant sco in ultimatum, uschia il schef da sport David Caduff.

La consequenza suenter quest ultim gieu pers uschè ault saja stà la relaschada per imediat. Il schef da sport na vul dentant betg mo dar la culpa al trenader. Suenter che l'US Schluein Glion è la primavaira piz a cup mitschada da la relegaziun eran ins conscients ch'i vegnia grev era en la nova stagiun. Durant la pausa da stad han plirs giugadurs ch'avevan sincerà da continuar, bandunà il club. Lura han ins era anc gì discletg cun blessads. Gieus ch'ins avess almain stuì tegnair pitg a l'adversari han ins pers, per part terradas fitg autas. Il club è crudà en ina spirala negativa.

audio
US Schluein Glion ha spedì il trenader
ord Actualitad dals 06.10.2021.
laschar ir. Durada: 3 minutas 20 Secundas.

Corsin Cavegn surpiglia ad interim

Per ils tschintg gieus che restan en la runda d'atun surpiglia Corsin Cavegn l'equipa da segunda liga. Il Lumnezian ha gia trais giadas surpiglià a curta vista sco trenader. El è era anteriur giugadur da Schluein Glion ed enconuscha uschia fitg bain club e giugadurs.

Il schef da sport spera ch'il plaschair, la motivaziun e l'engaschi turnian en l'equipa. Che trenader e giugadurs emprovian da volver la situaziun en ils gieus che restan fin la pausa d'enviern. Assistent dal trenader daventa cun Gabriel Derungs in ulteriur Lumnezian ed anteriur giugadur da l'US Schluein Glion. Era el en pensum ad interim. Sche quest duo daventa il duo fix a la lingia da l'equipa sursilvan na vul David Caduff betg tematisar uss, i saja da prender dafertanttiers.

RTR novitads 10:00

Artitgels legids il pli savens