Siglir tar il cuntegn

Header

cuntegn

Ballape Regiunal Surses gudogna il derbi rumantsch cunter Trun/Rabius

L'emprim derbi rumantsch da questa stagiun en terza liga va en favur dal CB Surses.

La squadra da Surses gudogna a chasa cunter il CB Trun/Rabius cun 2:1. Igl è stada ina partida egualisada. En l'emprima mesadad avess la squadra da Trun/Rabius stuì ir en avantatg - ha dentant manchentà la schanza davent dal punct da penalti. Curt suenter pausa èn ils da Surses ir en avantatg cun 1:0 e curt avant la fin han ils da Surses schizunt augmentà sin 2:0. Il gol per il CB Trun/Rabius è crudà per en las ultimas secundas da la partida ed uschia memia tard per far ina differenza. Omaduas equipas vegnan uss suenter 5 partidas sin 6 puncts e sa chattan uschia sulettamain trais puncts sur il stritg.

Il CB Lumnezia na vegn betg or da la fora. Er en la tschintgavla partida da la stagiun resta il CB Lumnezia senza puncts. Ordaifer cunter il leader da la tabella, il FC Glaruna, perdan ils Lumnezians cun 1:3. Cun 0 puncts resta Lumnezia cleramain a la cua da la tabella. A la testa resta vinavant il FC Glaruna, ch'aveva gia avant duas emnas battì ordaifer il CB Trun/Rabius cun 3:2.

Terrada per Cuira 97

Ina schleppa sto Cuira 97 magunar en la segunda liga interregiunala. L'equipa dal trenader Maximilian Knuth perda a chasa cunter il FC Weesen cun 2:5. Suenter 6 partidas sa chatta la meglra equipa grischuna sin posiziun 10 da la tabella e cun 6 puncts be 2 puncts sur il stritg.

Schleppa per Schluein/Glion

L'US Schluein/Glion perda a chasa cunter Vaduz cun 1:5. Per Schluein/Glion èsi gia la terzada la stagiun terrada en la 5avla partida. Cun sulettamain dus puncts sa chattan ils Sursilvans sin l'ultim plaz da la tabella ed uschia er sut il stritg. La distanza sin posiziun 7 en la tabella è dentant pitschna: sulettamain trais puncts.

RTR novitads 16:00

Artitgels legids il pli savens