Sco gia als gieus olimpics da stad a Tokio pon las naziuns nominar in duo che porta la bandiera. Quai en il senn da l'egualitad da gender. Als gieus a Beijing han Wendy Holdener ed Andres Ambühl quella onur. Sco Swiss Olympic scriva, ha il hockeyan dal HC Tavau merità questa onur cunquai che Beijing èn gia ses tschintgavels gieus olimpics. Als gieus d'avant 4 onns a Pyeongchang aveva cun Dario Cologna era in atlet grischun gì quella onur da manar la delegaziun svizra a la festa d'avertura. L'ultim hockeyan svizzer ch'ha purtà la bandiera svizra è stà Ueli Poltera l'onn 1952
Ambühl ha cuntanschì uschè bler en sia lunga carriera ed è adina restà in teamplayer
Cun Wendy Holdener porta l'emprima giada dapi 30 onns (Vreni Schneider ad Ablertville) puspè ina skiunza la bandiera svizra. Als ultims gieus olimpics a Pyeongchang ha la spezialista da slalom gudagnà in set da medaglias cumplet (aur en l'event da team, argient en il slalom, bronz en la cumbinaziun).
Sin ils fastizs da Roger Federer
Il 2008, cura che Beijing è stà ospitant dals gieus olimpics da stad, ha Roger Federer purtà la bandiera svizra en il stadion naziunal. Il di da l'avertura, venderdi (13:00 temp svizzer), èn Wendy Holdener ed Andres Ambühl uschia sin ils fastizs da Roger Federer cun avair al medem lieu la medema onur.