A Vienna daventan Nina Betschart e Tanja Hüberli campiunessas europeicas. En il final battan ellas Katja Stam e Raïsa Schoon dals Pajais Bass en dus sets, cun 21:15 e 21:12.
Las duas atletas svizras fan uschia revantscha, trais onns suenter lur terrada en il final dal campiunadi europeic cunter in auter pèr ollandais, Madelein Meppelink e Marleen van Iersel. L’onn passà avevan Joana Heidrich ed Anouk Vergé-Dépré gudagnà il titel europeic, ed uschia vegn quel per la segunda giada en fila en mauns svizzers.
In dir cumbat per vegnir en il final
Il duo svizzer Nina Betschart e Tanja Hüberli ha giugà in mezfinal dramatic cunter las Tudestgas Karla Borger e Julia Sude en il mezfinal. La finala han las duas Svizras gudagnà, suenter ch’ellas han pudì bloccar pliras ballas da matsch – cun 21:9, 22:24 e 16:14.
Las Ollandaisas Katja Stam e Raïsa Schoon da lur vart, han procurà en lur mezfinal per ina pitschna surpraisa. Ellas han bittà ora las quartas dal turnier olimpic Anastasija Kravcenkova e Tina Graudina da la Lettonia.
