Siglir tar il cuntegn

Header

video
Burri en il slopestyle senza schanza per in diplom
Or da Beijing 2022 Clips dals 06.02.2022.
laschar ir. Durada: 39 Secundas.
cuntegn

Beijing 2022 Burri sin rang 12 – umens manchentan final

  • Nagin di svizzer a Peking per ils snowboardists en la concurrenza da slopestyle.
  • Ariane Burri è dada tut las trais emprovas en la naiv – ed è la finala sa rangada sco 12avla.
  • Als dus umens svizzers n'èn las emprovas en la qualificaziun betg gartegiadas. Nicolas Huber e Jonas Bösiger restan perquai observaders tar il final.

En tut ils trais percurs dal final dal slopestyle è Ariane Burri cupitgada. Ella saja dentant tuttina cuntenta – da sa qualifitgar per il final saja stà ina super chaussa, ha Burri ditg. Dapli che rang 8 na fissi er en il cas optimal betg stà pussaivel.

Stgarpitschada è la Lucernaisa da 21 onns mintgamai tar il medem sigl. Trais giadas è il Cab 540 malgartegià, e l’emprima cupitgada ha la sportista era sentì corporalmain. Silsuenter haja manca in pau la segirezza da sasezza, ha Burri manegià.

video
Burri senza fortuna sin l'aissa
Or da Beijing 2022 Clips dals 06.02.2022.
laschar ir. Durada: 1 minuta 14 Secundas.

L’emna proxima ha Ariane Burri en il Big Air in’ulteriura schanza da partenza. En lezza concurrenza po er la Grischuna Bianca Gisler anc ina giada dar gas, suenter ch’ella aveva manchentà da sa qualifitgar per il final dal slopestyle.

video
Uschia ha la campiunessa olimpica briglià
Or da Beijing 2022 Clips dals 06.02.2022.
laschar ir. Durada: 2 minutas 41 Secundas.

Campiunessa olimpica dal snowboard slopestyle è daventada Zoi Sadowski Synnott da la Nova Zelanda. Argient e bronz han fatg en ina concurrenza cun bleras cupitgadas, l’Americana Julia Marino e Tess Coady da l’Australia. L’Americana Jamie Anderson, la campiunessa olimpica dal 2014 e dal 2018, n’è betg vegnida sin turas ed è sa rangada sulettamain sco 9avla.

Nagina schanza per il final

Senza atlets svizzers ha lieu il glindesdi en damaun il final dal snowboard slopestyle dals umens. Tant a Jan Bösiger sco er a Nicolas Huber n'èsi betg gartegià da sa qualifitgar per il final. Huber ha fatg rang 20 en la qualificaziun, Bösiger rang 25.

RTR novitads 06:00

Artitgels legids il pli savens