Eligius Tambornino chala cun argient: En il sprint al campiunadi svizzer a Realp fa il biatlet da Trun il segund plaz cun sulet in sbagl da sajettar. En sia davosa cursa da la carriera ha Tambornino manchentà per var 16 secundas da vegnir sisum il podest. Aur ha fatg Benjamin Weger. Era el en ina da sias davosas cursas da la carriera. Campiunessa svizra dal sprint è daventada Lena Häcki. Las soras Gasparin han desistì da partir.
Sonda bronz en 15 km cun partenza collectiva
La sonda aveva Tambornino gia gudagnà bronz en la cursa da 15 kilometers cun partenza collectiva al campiunadi svizzer – ch'aveva gia annunzià da chalar la fin da questa stagiun. Gudagnà la cursa aveva era là Benjamin Weger e Jeremy Finello cun il medem temp. Nico Salutt, che parta per il club Sarsura Zernez, è vegnì 5avel.
Campiunessa svizra da la cursa cun partenza collectiva è daventada Susi Meinen, avant Lena Häcki e Flurina Volken. Las soras Gasparin n'èn betg stadas a la partenza.
Campiunadi da junioras e giuvenils
En la categoria da junioras (6x1,5 km) ha gudagnà Alessia Laager (Samedan) la cursa. Sin il terz plaz sa tschenta Marlène Sophie Perren da Tavau. Sco ulteriuras atletas da clubs Grischuns èn Maëline Triponez (Tavau) daventada 6avla e Selina Murk (Cuira) 8avla.
En la categoria da giuvenils (6x2,0 km) ha Silvano Demarmels (Lantsch) fatg il pass sin il podest ed è daventà terz. Plinavant èn Jonin Wyss (Lantsch) daventà 11avel e Jakob Richter (Lantsch) 16avel.
Adattà al tema
Quant fitg ch’igl è da morder sin ils dents per ina carriera sportiva mussa il purtret dal biatlet Eligius Tambornino.
