Biatletas e biatlets svizzers èn ids cun grondas ambiziuns al campiunadi mundial a Nove Mesto en Tschechia. Il punct culminant da la stagiun ha er procurà per ina gronda festa da biatlon, ma deplorablamain betg ord vista svizra. Ils Svizzers han bandunà Nove Mesto cun terradas e trumpadas, quai in onn avant il campiunadi mundial da chasa a Lai. L’emprova generala è uschia ida pulit en las chautschas.
Betg persvadì han ils Svizzers cunzunt en la loipa. Là han els pers memia bler per pudair cumbatter cun ils megliers, tar las dunnas èn quai cunzunt stadas las Franzosas e tar ils umens il Norvegiais. Quai ha dentant er da far ch’ils Svizzers n’han betg gì il meglier material en Tschechia. Als umens da service da Swiss Ski n’èsi betg reussì durant las bun duas emnas da preparar in bun ski sin questa naiv speziala da Nove Mesto. E quai fa surstar, pertge durant l'emprima stagiun cun tschaira senza fluor han ils Svizzers quasi adina giu meglier material che la concurrenza. Ma gist a las pli impurtantas cursas da l'onn n'ha la crew da Swiss-Ski betg chattà il dretg recept. Quai ha procurà per in frust total ch'atletas ed atlets han adina puspè laschà sentir en l'arrivada.
Suenter Nove Mesto è avant Lai
En vista al proxim campiunadi mundial il 2025 a Lai èsi dad ir sur ils cudeschs, quai dentant betg sulet en chaussa material, mabain er en chaussa mentala per ch’i gartegia da clamar giu al di x, al di ch’i quinta la meglra prestaziun pussaivla.
Quai na vegn però er betg simpel en in onn a Lai. Il squitsch vegn numnadamain ad esser anc pli grond. Gronda vegn dentant er ad esser la motivaziun d’astgar cumbatter per las medaglias avant ils fans da chasa, quai en l’arena da biatlon a Lantsch nua che las Svizras ed ils Svizzers treneschan per la gronda part. E ch’els han il potenzial da finalmain gudagnar ina giada questa emprima medaglia ad in campiunadi mundial mussan ils resultats da la cuppa mundiala en questa stagiun, cunzunt da Lena Häcki-Gross ch'aveva schizunt gudagnà ad Antholz sia emprima cursa.