- La skiunza da freestyle Sarah Höflin vegn segunda a l'occurrenza da Big Air a Cuira, quai davos la Franzosa Tess Ledeux.
- Giulia Tanno vegn quarta tar ses comback.
- Kim Gubser tar ils umens croda duas giadas e vegn 10avel tar ils umens.
Suenter l'emprima emprova n'hai anc betg guardà or bain per Sarah Höfflin. La Genevrina è crudada e be vegnida sin plazza 7. En la segunda runda ha ella dentant mussà in ferm sigl cun 93,25 puncts ed ha surpiglià la testa. Sia marca ha suenter be anc Tess Ledeux surpassà (95,25). Terza è vegnida la Canadaisa Elena Gaskell.
Comeback da Tanno reussì
Giulia Tanno ha mussà in bun comeback, suenter ch'ella aveva rut l'entschatta da l'onn ses bratsch. Suenter l'emprim sigl era la Grischuna cun 88 puncts sin rand 2. En il segund sigl è ella dentant crudada ed è perquai dada enavos sin il quart plaz.
Gubser senza fortuna – Svancer cun sigl quasi perfetg
Tar ils umens ha Kim Gubser dumagnà sco sulet Svizzer en il final dals megliers 10. Là ha il victur da la medaglia da bronz al campiunadi mundial 2021 dentant omaduas giadas betg pudì star en pe cun sa tschentar ed è perquai la finala vegnì 10avel.
Il cumbat per la victoria è stà in crimi. La finala ha gudagnà l'Austriac Matej Svancer cun ina nota da siemi da 99 puncts, davant il Canadais Teal Harle cun 98 puncts ed il Norvegiais Birk Ruud cun 97,25 puncts.
Vent ha chaschunà retard
Ils finals da las dunnas e dals umens ha stuì vegnir spustà ed ha la finala cumenzà cun duas uras retard. Ferm vent avant la segunda runda da qualificaziun dals umens è stà la culpa.
