Siglir tar il cuntegn

Header

video
Il Big Air ha cumenzà - la cuppa mundiala da freestyle a Cuira
Or da Telesguard dals 22.10.2021.
abspielen. Laufzeit 2 minutas 38 Sekunden.
cuntegn

Big Air Festival Cuira Spectacul sin skis e snowboard

Dapi il venderdi a bunura sgolan ils skiunzs da freestyle sur la schanza da Big Air a Cuira e cumbattan uschia per ils emprims puncts da la cuppa mundiala en questa stagiun. La sonda vegnan ils snowboardists en acziun.

Tar omaduas occurrenzas vai er gist l’emprima giada per sa qualifitgar per ils gieus olimpics d’enviern il favrer 2022 a Peking.

Durant il di vegnan mintgamai manads atras las qualificaziuns per ils finals. Quel da freeski è il venderdi saira a partir da las 18:00, ils megliers snowboardists cumbattan la sonda saira a partir da las 18:00 per la victoria a l’emprim Big Air Cuira. Tut en tut vegn mussà radund 1’500 sigls quels dis sin la schanza da passa 40 meters autezza che sa chatta a l’Obere Au.

audio
Big Air – l'emprim di dals sigls sin la schanza a Cuira
aus Actualitad vom 22.10.2021.
abspielen. Laufzeit 6 minutas 59 Sekunden.

Giulia Tanno – il trumf grischun

Cun la concurrenza da Big Air a Cuira vegn per l’emprima giada insumma lantschada ina stagiun da la cuppa mundiala en Svizra. Il pli savens èn las emprimas concurrenzas en la Nova Zelanda u en l’America dal Nord. In mument tut spezial è quai per atletas ed atlets da Swiss-Ski. Ina da las grondas favuritas en la concurrenza da freeski è Sarah Höfflin da Genevra ch’è vegnida il 2018 a Pyeongchang campiunessa olimpica en il slopestyle. Il medem onn ha Höfflin er gudagnà aur en la concurrenza da Big Air als X-Games ad Aspen en ils Stadis Unids.

Cun Giulia Tanno da Lai cumbatta er ina Grischuna per in plaz da podest a Cuira. La giuvna da 23 onns ha en sia carriera gia gudagnà duas concurrenzas da la cuppa mundiala en la disciplina Big Air, la davosa il schaner a Kreischberg en l’Austria. Tanno ha er gudagnà ils davos onns duas giadas il classament general en la disciplina Big Air.

Giulia Tanno
Legenda: Giulia Tanno – ina da las meglras atletas da freeski dal mund swissski

A la concurrenza da chasa na s’auda Giulia Tanno dentant betg tar las top favuritas. La raschun; il schaner è ella sa blessada vid in bratsch, er ina frida mentala. A Cuira sa legra ella uss dentant da mussar sia classa avant ils fans da chasa. La famiglia ed amis, tuts sajan da la partida ha Tanno ditg a l’ur da quest spectacul.

Ragettli manca a l’Obere Au

Betg da la partida è Andri Ragettli da Flem. Il victur dal classament general da Big Air da la stagiun 2018/19 ch’è sa blessà vid in schanugl il mars 2019 suenter ses titel da campiun mundial en il slopestyle n’è anc betg fit avunda per sa metter a la partenza dad ina tala concurrenza. El saja sin buna via, il Big Air Cuira vegnia dentant per el in zic memia baud, ha Ragettli communitgà. Il spezialist grischun da freeski metta il focus sin ils gieus olimpics a Peking.

Andri Ragettli
Legenda: Andri Ragettli da Flem sto persequitar la concurrenza a l'ur da la schanza. Keystone

Tar snowboardists èn las speranzas svizras sin Jonas Bösiger dal chantun Sviz. L’atlet da 26 onns ch’è vegnì terz al campiunadi mundial dals juniors è gia stà quatter giadas sin in podest da la cuppa mundial tar l’elita.

Millis e millis fans enturn la schanza

Al festival da Big Air a Cuira èn per l’emprima giada dapi passa in onn er puspè fans ed aspectaturs da la partida. I vegn spetgà quels dus dis radund 17’000 visitadras e visitaders. Sper las occurrenzas sportivas stat la musica en il center. Durant dus dis datti divers concerts da gruppas e bands da num e pum.

Actualitad 17:00 uras

Artitgels legids il pli savens

Scrollar a sanestra Scrollar a dretga