Bike Maraton Lumnezia - Gudagnai duas plazzas da partenza per la cursa da tradiziun

Il Bike Maraton Lumnezia è in classicher ch'è quest onn ils 3 d'avust e quai per la 34avla giada. Il traject da cursa maina sur 38 kilometers ina giada tras la Lumnezia sura. La partenza è a Lumbrein, nua ch'ils ciclists e las ciclistas van siadora enfin Staviala Vedra, suenter maina la ruta sur las aclas da Lumbrein e Vignogn enfin sin l'Alp Sezner nua che la cursa cuntinuescha enfin a Morissen. Da Morissen èsi da turnar da la val anen enfin a l'arrivada a Lumbrein. En tut han las mountainbikeras ed ils mountainbikers da surmuntar 1'590 meters d'autezza.

L'onn passà ha l'indigen Vital Albin ch'è creschì si a Tersnaus gudagnà la cursa en Lumnezia, tar las dunnas è stada la svelta Ginia Caluori da Panaduz. Omadus atlets van cursas da la cuppa mundiala da mountainbike. Sper la cursa principala datti ils 3 d'avust er ina cursa da bike per uffants. L'onn passà hai dà per l'emprima giada il di avant il Bike Maraton Lumnezia ina cursa da muntogna. Er quest onn datti ina cursa per curridras e curriders, quai ils 2 d'avust, ina cursa d'uffants è medemamain planisada quel di.

Plazzas da partenza per il Bike Maraton Lumnezia

Avais Vus gust da sa mesirar sin il bike ils 3 d'avust al Bike Maraton Lumnezia? Cun Vossa participaziun ed in zic fortuna pudais Vus gudagnar ina partenza per la cursa, RTR regala en tut duas plazzas da partenza. Enfin ils 6 da fanadur pudais Vus prender part – ils victurs vegnan enconuschents ils 7 da fanadur.

Tips dal biker Andrin Beeli

Per in cursa sco il Bike Maraton Lumnezia vali d'esser bain preparà per dumagnar ils 38 kilometers. Andrin Beeli, biker da Sagogn ha inqual tip per che la tura ni la cursa da bike gartegia.

RTR bike 2025

Avrir la box Serrar la box

RTR rapporta da concurrenzas da bike sco il Swiss Epic u il Cape Epic ma er d'atletas ed atlets grischuns cun ambiziuns pli grondas u pli pitschnas sin il bike.

Ina purschida per tut ils fans da mountainbike: rapports, contribuziuns e tips.