Andrin Beeli, in dals gronds favurits, ha gudagnà il Bike Maraton Lumnezia. Il mountainbiker da Sagogn ha duvrà per ils 38 kilometers cun 1'850 meters differenza d’autezza cun partenza ed arrivada a Lumbrein 1:54 uras – ed ha uschia realisà in nov record. La finala ha Beeli battì ses collega engiadinais Fadri Barandun per bun ina minuta. Omadus han uschia mussà che la furma constat en vista al Swiss Epic che cumenza ils 13 d’avust a Tavau.
Podest umens d’elita:
- Andrin Beeli 1:54:11 uras
- Fadri Barandun +1:06 minutas
- Timon Rüegg +2:51 minutas
Betg stads a la partenza èn ils victurs da l’onn passà, Ginia Caluori da Panaduz e Vital Albin oriund da Tersnaus.
Resultats Bike Maraton Lumnezia 2025
Clera victoria tar las dunnas
Tar las dunnas ha Anna Weinbeer da Basilea gudagnà a moda suverana. Cun Carla Solèr sco terza ha er in’indigena pudì far il pass sin il podest. Ses figl Alessandro Solèr ha gudagnà la cursa dals giuvens sut 19 onns. Tar las giuvnas U19 ha Selina Schweizer gudagnà, er ella sco ils Solèrs commembra dal Club da velo Surselva.
Podest dunnas:
- Anna Weinbeer 2:15:59 uras
- Andrea Ming +22:30 minutas
- Carla Solèr +25:11 minutas
Tut en tut èn stadas a la partenza 155 atletas ed atlets. Il suentermezdi han plinavant radund 100 uffants prendì part a las cursas d’uffants. Tino Solèr, il president dal comité d’organisaziun, tira cunquai in facit positiv. Els hajan puspè pudì augmentar il dumber da participants, tranter quels er blers indigens.
Davos las culissas da l'occurrenza, ed ina visita prominenta
La sonda gudogna Fanger la cursa da muntogna
Per la segunda giada è stada en il rom dal Bike Maraton Lumnezia ina cursa da muntogna, ina cursa da currer da Lumbrein sin l'alp Staviala Vedra. Sur la distanza da 6,1 kilometers han curridras e curriders surmuntà radund 600 meters d’autezza. Tut en tut èn stads a la partenza 68 sportistas e sportists, quai tar aura bletscha e fraida.
Nov temp da record
Martin Fanger dal chantun Sursilvania ha gudagnà la cursa dals umens en in nov temp da record. Il spezialist da mountainbike ha duvrà per quest tschancun da Lumbrein sin l'alp Staviala Vedra 36:30 minutas – ed è uschia stà 3:25 minutas pli spert che Manuel Isenmann da Castrisch ch'aveva triumfà tar la premiera il 2024. Cumplettà il podest sco terz ha Ivan Demont.
Rangaziun cursa da muntogna Staviala Vedra
Tar las dunnas ha Sabrina Degonda pudì defender la victoria da l'onn passà, quai en in temp da 49:41 minutas. Ella ha distanzià piz a cup Marinette Martin da la Svizra franzosa per 22 secundas. Cumplettà il podest ha Olivia Imfeld ch'è vegnida terza.
38 kilometers sin trutgs tras la Lumnezia
Il traject da la cursa dal Bike maraton da la dumengia maina sur 38 kilometers ina giada tras la Lumnezia sura. La partenza è a Lumbrein, nua ch'ils ciclists e las ciclistas van siadora enfin Staviala Vedra, suenter maina la ruta sur las aclas da Lumbrein e Vignogn enfin sin l'Alp Sezner nua che la cursa cuntinuescha fin a Morissen. Da Morissen èsi da turnar da la val anen enfin a l'arrivada a Lumbrein. En tut han las mountainbikeras ed ils mountainbikers da surmuntar 1850 meters d'autezza.
L'onn passà ha l'indigen Vital Albin ch'è creschì si a Tersnaus gudagnà la cursa en Lumnezia, tar las dunnas è stada la svelta Ginia Caluori da Panaduz. Omadus atlets van cursas da la cuppa mundiala da mountainbike.
Sper la cursa principala datti ils 3 d'avust er ina cursa da bike per uffants.
38 kilometers
1'590 meters d'autezza
radund 240 participantas e participants
25% dunnas e 75% umens
ca. 100 voluntarias e voluntaris
Summa totala da premis: 2'000 francs. Per la dunna pli sperta ed il um pli spert a Staviala Vedra datti in premi da muntogna: ina chaschola. Er datti autras schanzas sin premims materials.
Bike Maraton 2024
-
Bild 1 von 4. Bildquelle: Bike Marathon Lumnezia.
-
Bild 2 von 4. Bildquelle: Bike Marathon Lumnezia.
-
Bild 3 von 4. Bildquelle: Bike Marathon Lumnezia.
-
Bild 4 von 4. Bildquelle: Bike Marathon Lumnezia.
Tips dal biker Andrin Beeli
Per in cursa sco il Bike Maraton Lumnezia vali d'esser bain preparà per dumagnar ils 38 kilometers. Andrin Beeli, biker da Sagogn ha inqual tip per che la tura ni la cursa da bike gartegia.
RTR rapporta da concurrenzas da bike sco il Swiss Epic u il Cape Epic ma er d'atletas ed atlets grischuns cun ambiziuns pli grondas u pli pitschnas sin il bike.
Ina purschida per tut ils fans da mountainbike: rapports, contribuziuns e tips.