Questa stad ha la giuvna propi cumenzà a far furora en ses sport. La fin fanadur è ella sa participada als gieus olimpics da giuvenils en Slovachia, nua ch'ella è vegnida quarta. E la davosa fin d'emna ha Selina Capaul gudagnà ils campiunadis svizzers en la categoria sut 18 onns. Ella ha dumagnà in record persunal cun bittar la lantscha sin 50.63 meters.
Fascinaziun per in sport «exotic»
Ch'i è in sport in zic nunusità è in dals motivs, daco che bittar la lantscha fascinescha la giuvna da 16 onns. Cuntrari al ballape per exempel, na fetschian betg bleras persunas quest sport. E quai saja schont anc spezial.
Igl è in sentiment ch'jau na sai strusch descriver. Igl è simplamain bel da bittar la lantscha.
I dovra precisiun, coordinaziun ed er la dretga tecnica per far quest sport. Tut stoppia constar – davent da la bratscha fin tar las chommas – en il mument ch'ins bittia la lantscha, di Selina Capaul che fa quest sport «exotic» dapi quatter onns. Avant aveva ella gia empruvà ora differents sports. Propi chattà la passiun ha ella dentant pir cun trair la lantscha.
Dis libers èn stgars
Radund sis giadas per emna trenescha la giuvna ch'è commembra dal club d'atletica leva da Cuira. Duas giadas a Turitg cun l'equipa naziunala. Dasperas fa ella anc la matura gimnasiala en la scola chantunala a Cuira. Cler che quai è intensiv. Tuttina dettia mo paucs dis, nua che la motivaziun manchia, raquinta la giuvna sportista.
En tge direcziun che sia vita professiunala giaja, na sappia ella betg anc exact. Eventualmain vul la giuvna lavurar pli tard sco fisioterapeuta u en la medischina. Mo cler, actualmain viva Selina Capaul spezialmain per sia gronda passiun: bittar la lantscha.
