Anina Hutter sut las top 10
Meglra grischuna è stada Anina Hutter. La giuvna da Trimmis ha terminà la cursa sco 9avla cun in retard da 4:45 minutas. Hutter ha ditg cumbattì per ina plazza sut las top 5, a la fin han mancà in zic las fozas. Il di avant era Anina Huter daventada campiunessa mundiala en il Team Relay, quai tranter auter ensemen cun Nino Schurter. La terza grischuna, Lorena Cadalbert da Cuira, è vegnida 31avla cun in retard da 9:03 minutas. Tut en tut èn stadas a la partenza 62 junioras, da quai tschintg svizras.
Aur ed argient per la Svizra
Campiunessa mundiala en la cursa da cross-country da las junioras è vegnida a moda suverana Monique Halter da Herisau. La giuvna da 18 onns ha gudagnà cun in avantatg da 1:16 minutas sin la concurrenza. Halter ha surpiglià la testa gia suenter il sajet da partenza e da runda tar runda augmentà ses avantatg sin la concurrenza.
Monique Halter era gia vegnida dacurt campiunessa europeica ad Anadia en il Portugal e valeva er a Les Gets sco ina da las favuritas. Ella vala sco ina da las actual pli talentadas mountainbikeras da la Svizra ed è uschia ina gronda speranza per l'avegnir. Monique Halter è collega d'equipa da Chiara Solèr tar il team da «Thömus Akros Young Stars».
Grazia a Lea Huber hai dà ina victoria dubla per la Svizra. La mountainbikera dal chantun Argovia è vegnida segunda ed ha uschia gudagnà argient. Huber ha pers 1:16 minutas sin Monique Halter. Cumplettà il podest sco terza cun in retard da 1:26 minutas ha la Polaca Natalia Grzegorzewska.
Argient per Jan Christen
Er en la cursa dals juniors sut 19 onns hai dà in medaglia per la Svizra, gia la quarta a quest campiunadi mundial a Les Gets. Jan Christen dal chantun Argovia è vegnì segund ed ha uschia gudagnà argient. El ha pers 18 secundas sin il nov campiun mundial dals juniors, il Tudestg Paul Schehl. Cumplettà il podest sco terz ha il Franzos Paul Magnier, quai cun in retard da 24 secundas.
Il Grischun Mauro Hassler da Cuira ha terminà la cursa sin plazza 54 cun in retard da 8:23 minutas.
