Gia suenter l'emprima mesadad è tut stà cler: entras Serge Gnabry e Robert Lewandowski - ch'ha tranter auter fatg ses 33avel goal questa stagiun - è il defensur dal titel gia ì cun in 2:0 en la pausa. Suenter pausa ha Emre Can bain pudì reducir sin 2:1 suenter in penalti - per dapli n'hai però betg tanschì. Trais rundas avant la fin da la stagiun na po pia nagin’equipa pli engular il titel a la squadra da Julian Nagelsmann.
Per il campiun da record n'è il titel però betg dapli ch'ina pitschna consolaziun. L'equipa ha numnadamain manchentà la gronda finamira ch'ella aveva mess a sasez avant la stagiun, numnadamain il titel en la Champions League. Là èn ils Tudestgs gia crudads or suenter il quartfinal cunter Villareal. Er en il DFB Pokal n'è il campiun betg vegnì sur la segunda runda or.
