A las biatletas svizras n'èsi er betg reussì in exploit en la cursa da persecuziun tar il campiunadi europeic da biatlon a Lai. Pudì mussar ina prestaziun solida ha sulet la Grischuna Lea Meier ch'ha fatg in pass dal 32avel sin il 20avel plaz. La giuvna biatleta dal Partenz ha fatg en questa cursa sur 10 kilometers be dus sbagls da sajettar. Las ulteriuras svizras, Flurina Volken, Lydia Hiernickel e Susanna Meinen èn classadas sin ils plazs 41, 42 e 43.
Nova campiunessa d'Europa en la cursa da persecuziun è Selina Grotian. Il grond talent tudestg ha gudagnà avant la Svedaisa Tilda Johansson e la Franzosa Gilonne Guigonnat.
Dominanza norvegiaisa tar ils umens
En la cursa da persecuziun dals umens sur 12,5 kilometers han ils biatlets norvegiais festivà ina victoria traidubla. Vebjoern Soerum ha triumfà avant ses cumpatriots Erlend Bjoentegaard ch'aveva gudagnà il sprint ed Endre Stroemsheim.
Il trio svizzer ha trumpà, principalmain er da sajettar. Cun gist otg sbagls da sajettar e Dajan Danuser stà il meglier svizzer sco 45avel. Gist davos Danuser è Joscha Burkhalter classà sco 46avel cun tschintg sbagls da sajettar. Sandro Bovisi ha cun set sbagls da sajettar terminà la cursa da persecuziun sin plaz 48. Betg pudì ir a la partenza ha l'indigen Laurin Fravi. Il biatlet da Lantsch era vegnì be 87avel en il sprint. Per la cursa da persecuziun han be ils megliers 60 dal sprint pudì ir a la partenza.
Serafin Wiestner parta en la cursa da staffetta
La dumengia va il campiunadi europeic da biatlon a Lai a fin. Sin il program spetgan il davos di anc las cursas da staffetta. En la staffetta maschedada partan per la Svizra Lea Meier, Lena Häcki-Gross, Sebastian Stalder e Serafin Wiestner da Trin che vegn uscha era anc en acziun a quest campiunadi europeic da chasa. En la staffetta singula van a la partenza per la Svizra Amy Baserga e Niklas Hartweg, il dus giuvens talents da 22 onns.
