Jason Joseph gudogna aur al campiunadi europeic en la halla ad Istanbul – quai en il sprint d'obstachels sur 60 meters. Cun 7,41 secundas ha el mess si in nov record svizzer. Per Joseph èsi l'emprima medaglia tar l'elita.
Dapi il campiunadi mundial dal 2019 a Doha n'ha l'um da 24 onns mai pudì dumandar giu ses entir potenzial. Uss ha il campiun d'europa d'U23 ed U20 pudì ir l'emprima giada per ina medaglia ad in event internaziunal da questa grondezza.
Ditaji Kambundji gudogna bronz
Era tar las dunnas hai dà ina medaglia svizra. Ditaji Kambundji gudogna en la medema disziplina bronz. Gudagnà ha la finlandaisa Reeta Hurske.
L'avust passà aveva ella gia cuntanschì bronz al campiunadi europeic a Minca il 2022. Grazia a ses record svizzer (7,81) era la Bernaisa viagiada en Tirchia sco numer 2 da l'Entry List.
