Il duo svizzer Alina Pätz e Sven Michel gudogna argient al campiunadi mundial da curling. La Turitgaisa ed il Bernais perdan il final en la categoria dal duo olimpic mischada cunter la Scozia cun 7:9. Ils Scots n'han pers nagin gieu en il turnier.
Il final ha entschet mal per Pätz/Michel. Els han stuì acceptar en l'emprim end, ina chasa da quatter e gist suenter in punct engulà. Da la gronda retardada n’han els mai pudì sa revegnir endretg. Grazia ad ina chasa dubla engulada en il sisavel dad otg ends èn els vegnids fin sin in punct (6:7) als Scots, ma ils Scots han respundì immediatamain cun ina chasa da dus. Cun lur fermas prestaziuns da l’entira emna han Eve Muirhead e Bobby Lammie confermà lur success stravagant durant questa stagiun. Als giugs olimpics a Peking ha ella gudignà aur ed el argient cun lur teams da curling a quatter.
