- Loïc Gasch va per argient al campiunadi mundial da l'atletica leva en halla.
- L'um da 27 onns da Yverdon siglia in'autezza da 2,31 meters e festivescha cun quai ses emprim podest tar in eveniment grond.
Loïc Gasch n'ha betg pudì rumper la marca da 2,34 meters. Tuttina ha el pudì cuntancher ils 2,31 meters en la segund'emprova e gudogna uschia la medaglia d'argient en il campiunadi mundial da l'atletica leva en halla a Belgrad. Avant n'aveva el numnadamain fatg nagins sbagls. Per el è quai l'emprima medaglia ad in'occurrenza gronda.
Gasch è siglì la terza giada 2,31 meters, l'emprima giada en halla. Tar 2,33 meters è ses record svizzer en il liber da l'onn 2021. En halla è la meglra prestaziun d'enfin uss stada tar 2,27 meters. Igl è l'emprima medaglia en ina disciplina tecnica durant in campiunadi mundial, per la Svizra, dapi il 1991. Là aveva Werner Günthör fatg aur en stuschar la culla.
Per aur è ì il Sidcorean, Sanghyeok Woo, ch'è siglì 2,34 meters. Terz è vegnì il victur dals gieus olimpics Gianmarco Tamberi da l'Italia ensemen cun il Novzelandais Hamish Kerr (2,31 meters).
