Sco gia ils onns 2013, 2018 e 2024 ha la naziunala svizra gudagnà la medaglia d'argient al campiunadi mundial. Dentant uschè datiers sco tar il turnier en il Danemarc ed en la Svezia n'è l'equipa da Patrick Fischer darar stada al titel. Pir en la prolungaziun dal final han ils Americans pudì sajettar il gol decisiv al 0:1. En la terza minuta da la prolungaziun è crudada la decisiun che ha sepulì il siemi dals Svizzers da returnar a chasa cun la medaglia d'aur.
Leonardo Genoni daventa MVP
Las prestaziuns dal goli svizzer Leonardo Genoni al campiunadi mundial èn vegnidas onuradas – malgà la terrada en il final. El è vegnì elegì sco il giugader il pli custaivel (MVP) e sco il meglier goli dal turnier. Il goli da l'EV Zug ha terminà il campiunadi cun ina quota da tegnair da passa 95 pertschient e quatter shutouts. Ed en il final pers cun 0:1 cunter ils Stadis Unids ha el tranter auter tegnì in penalti.
Leonardo Genoni è suenter Kevin Fiala (2024) e Roman Josi (2013) il terz MVP svizzer en l'istorgia. Dean Kukan è sco Genoni vegnì elegì en l'equipa dals stars dal turnier.
Themen in diesem Liveticker
- Svizra sto sa cuntentar cun argient
- Bronz per la Svezia
- La Svizra stat en il final
- Ils Stadis Unids èn en il final
- Campiunadi mundial 2029 en Slovachia
- L'Austria senza schanza – Svizra va cun 6:0 en il mezfinal
- Svizra frunta en il quartfinal sin l'Austria
- Svizra gudogna cunter il Kasachstan senza brigliar
- Frantscha è l'emprima squadra relegada
- Svizra batta Ungaria 10:0
Prevista: Svizra vul cumbatter per aur
La naziunala svizra sut la batgetta da Patrick Fischer ha fatg il viadi vers il Danemarc cun grondas ambiziuns. Al davos campiunadi mundial eran ils Svizzers vegnids franads pir en il final da la Tschechia (0:2). Ussa, in onn pli tard, siemian ils Svizzers dad aur.
Vi dal Danemarc e la Svezia ha naziunala Svizra bunas regurdientschas. Il davos campiunadi mundial en il Danemarc è stà il 2018, il davos en Svezia il 2013. Ed en omadus turniers ha la Svizra dumagnà il pass en il final. Il 2013, lura anc cun il trenader Sean Simpson, aveva la Svizra pers il final cunter la Svezia cun 1:5. Er il 2018 avevi dà argient suenter ina stretga terrada suenter penaltis, danovamain cunter ils Svedais.
Tschintg giugaders dal HCD
Vegnids nominads per quest turnier èn er tschintg giugaders dal HCD. Dasper il goli Sandro Aeschlimann èn quai er ils defensurs Sven Jung e Michael Fora, sco era ils attatgaders Simon Knak ed Andres Ambühl che vegn uschia a giugar ses 20avels campiunadis mundials – in record.
A rinforzar l’equipa da Patrick Fischer vegnan er divers cracks ord la National Hockey League. Quai èn ils dus attatgaders dals New Jersey Devils, Nico Hischier e Timo Meier - sco er ils defensurs Jonas Siegenthaler, medemamain dals New Jersey Devils, e Janis Moser da Tampa Bay Lightining. Betg da la partida èn percunter Kevin Fiala dals Los Angeles Kings ed il Grischun Nino Niederreiter che frunta actualmain cun ses Winnipeg Jets en il quartfinal dals playoffs sin ils Dallas Stars.
Ils stadions
-
Bild 1 von 2. Avicii Arena, Stockholm: Il Stadion en la chapitala svedaisa è pli enconuschent sut il num «Globen». Bunamain 14'000 persunas han plaz en questa arena ch'è vegnida averta il 1989. Dapi lura è il stadion vegnì modernisà pliras giadas, la davosa giada il 2024. Bildquelle: SRF.
-
Bild 2 von 2. Arena Herning: Gia il 2018 è vegnì manà atras en questa arena multifuncziunala cun ina capacitad da 12'000 persunas gieus dal campiunadi mundial da hockey. Quest onn è l'Arena Herning era stada il dachasa dal campiunadi mundial da ballamaun. Bildquelle: SRF.
Las squadras participantas
| Gruppa A | Gruppa B |
|---|---|
| Canada | Tschechia |
| Finlanda | Svizra |
| Svezia | USA |
| Slovachia | Germania |
| Lettonia | Danemarc |
| Austria | Norvegia |
| Frantscha | Kasachstan |
| Slovenia | Ungaria |
En cumparegliaziun cun il davos campiunadi mundial en la Tschechia èn da nov da la partida la Slovenia e l’Ungaria. Percunter han la Gronda Britannia e la Pologna stuì star a chasa. Era betg da la partida, quai gia per la quarta giada en roda, èn la Russia e la Bielorussa ch’èn serrads vinavant da la IIHF pervia da la guerra en l'Ucraina. Il defensur dal titel è la Tschechia ch’ha battì avant in onn en il final a Prag la Svizra cun 2:0.
Il plan dals gieus da la Svizra
La naziunala svizra dat tut ils gieus da gruppa a Herning. Dus gieus da quartfinal èn lura a Stockholm. Avess la Svizra da cuntanscher la fasa da k.o., lura stuess l’equipa da Patrick Fischer, tut tenor constellaziun, midar dal Danemarc en Svezia. Ils dus gieus da mezfinal sco era il final ed il gieu per il terz e quart plaz vegnan tuts giugads a Stockholm.
| Data | Team 1 | Team 2 |
|---|---|---|
| 09 da matg, 16:20 uras | Svizra | Tschechia |
| 10 da matg, 20:20 uras | Danemarc | Svizra |
| 12 da matg, 16:20 uras | USA | Svizra |
| 15 da matg, 16:20 uras | Svizra | Germania |
| 16 da matg, 20:20 uras | Svizra | Norvegia |
| 18 da matg, 20:20 uras | Ungaria | Svizra |
| 20 da matg, 12:20 uras | Svizra | Kasachstan |
Il modus
En las duas gruppas A e B, cun mintgamai otg equipas, frunta mintgin sin mintgin. Ils top 4 da mintga gruppa sa qualifitgeschan per ils quartfinals. En la runda da k.o. cun las meglras otg equipas vegni tar ils suandants duels:
| 1. gruppa A | 4. gruppa B |
| 3. gruppa B | 3. gruppa A |
| 1. gruppa B | 4. gruppa A |
| 2. gruppa A | 3. gruppa B |