Aur n'hai betg pli dà, ma anc ina giada vicecampiun mundial è el vegnì. Tar ses 20avel ed ultim campiunadi mundial da hockey. E quai è in record: Nagin auter n'ha giugà uschè blers campiunadis mundials da hockey en il dress da l’equipa naziunala.
Andres Ambühl è en tut ils reguards in um da record. Nagin auter n'ha dà uschè bleras partidas en la pli auta liga da hockey svizra sco il Grischun – totalmain 1'322 gieus.
Nagin auter n'ha dà uschè bleras stagiuns en il dress dal HCD – totalmain 21 stagiuns. Las ultimas 11 stagiuns sco chapitani.
E nagin auter giugader svizzer è vegnì onurà uschè savens dals fans en Svizra sco meglier giugader da la liga naziunala – otg giadas han ils fans declerà el sco il pli impurtant giugader.
Sin il glatsch a Tavau sa serra il circul en liga naziunala
La stagiun 2000/2001 ha Andres Ambühl pudì dar las emprimas partidas en liga naziunala A per il HCD. 25 onns pli tard e cun sis titels da campiun svizzer cun il HCD ed ils ZSC Lions è ida a fin en ils mezfinals dals playoffs cunter ils ZSC Lions la grondiusa carriera dal leader grischun. Gugent avess Andres Ambühl giugà anc ina ulteriura partida encunter sia segunda amur en Svizra. La ferma equipa da Turitg ha dentant terminà il temp dal hockeyaner d’excepziun en liga naziunala la saira da gievgia, ils 10 dad avrigl 2025.
Era suenter tut ils success che Andres Ambühl ha cuntanschì sco giugader da hockey è el restà cun ils pes per terra. Adina ha el mess la prestaziun da l’equipa en il center. Er a la fin da sia lunga carriera. Losch sin tut quai ch'el ha cuntanschì, dentant senza perder ina larma da cordoli, ha Andres Ambühl prendì cumià da ses fans dal HCD. E quels din: Grazia fitg per tut, «Büehli».
Andres Ambühl e Marc Wieser din adia
-
Bild 1 von 3. Suenter la davosa partida, Andres Ambühl e Marc Wieser. Bildquelle: RTR.
-
Bild 2 von 3. Il HCD cun Ambühl e Wieser di adia als fans. Bildquelle: RTR.
-
Bild 3 von 3. Standing ovations dals fans per «lur» HCD. Bildquelle: RTR.
