Igl è stà l'ultima chaschun per Elena Stucki da vegnir selecziunada per il campiunadi mundial da juniors. Il schaner ha ella cumplenì ses 21avel anniversari. Uschia che la skiunza da Flond è en sia ultima stagiun da juniora. Ch'ella ha stuì spetgar sin quella premiera ha da far cun blessuras che han adina puspè frenà.
Finalmain pos jau ir ed jau vi turnar a chasa cun ina medaglia
Il schaner 2024 ha ella fatg ses emprims puncts en la Cuppa d'Europa. La stagiun 2023/24 ha prendì ina fin disgraziada cun ina ruttadira dal ventrigl ed in stgarp d'in liom dal pe (sindesmosa). Sin la stagiun 2024/25 ha Swiss Ski selecziunà ella direct en il cader B. La stagiun da comeback ha cumenzà bain. Tranter auter cun ses emprim plaz en las top 15 d'ina cursa da la Cuppa d'Europa. Sia emprima stagiun en in cader da Swiss Ski è dentant stada a fin gia il schaner. Elena Stucki croda durant in trenament. Puspè stgarpa ella plirs lioms dal pè. Questa giada dal pe sanester. Danovamain reabilitaziun e pazienza. Sin la via enavos ha era il chau dà sincur cun muments da dubis. Elena Stucki ha puspè stuì survegnir confidenza en ils skis lungs e las pistas pretensiusas e sveltas. Ils buns resultats gist al cumenzament da questa stagiun han contribuì a la confidenza. En cursas rapidas da la Cuppa d'Europa hai dà ils plazs 8, 12, 7, 9 ed 11. Tge che munta actual plaz 9 en la rangaziun da disciplina. Resultats che catapulteschan ella finalmain era ad in campiunadi mundial da juniors. Sin sia via ha ella adina punctuà che quella WM saja ina da sias finamiras.
Quai è fin uss il pli grond en mia carriera. Ina cumplet nova situaziun. Jau spetg grondas emoziuns a mes emprim eveniment grond
Elena Stucki na vul betg be esser da la partida a quella WM da juniors a Narvik en Norvegia. En sia disciplina da parada, la cursa rapida, vul el gudagnar ina medaglia. Quai saja realistic. Sch'ins guarda ils resultats da sias concurrentas en la Cuppa d'Europa, ch'astgan parter als mundials, lu è la Sursilvana en tut las rapidas ch'ella ha fatg questa stagiun stada tranter las trais sveltas. La juniora da Flond fa cun punctuar da vuler gudagnar ina medaglia pulit squitsch a sasezza. Forsa era perquai ch'ella sa che sia emprima WM è era gist sia ultima en la categoria da junioras. Sper la cursa rapida da sonda (7 da mars) parta Elena Stucki la dumengia (8 da mars) era en il super-G.
Narvik 2026 è avant Narvik 2029
La stad passada ha Elena Stucki terminà la matura al gimnasi da sport a Tavau. Avant che cumenzar cun il studi e sescolar a la fisioterapeuta vul ella uss metter cumplet sin la carta skis. Trenar e filar vid sia carriera che duai menar ella en la cuppa mundiala. Ella vul duvrar ed investar tut sias energias en il sport ed in bel di tutgar pro l'elita mundiala. Narvik 2026 è uss insatge cumplet nov per Elena Stucki, na be la WM sco tala, mabain era las pistas nua ch'i vegn cumbattì per medaglias e titels ed insuma l'entira atmosfera. Suenter quest campiunadi mundial «pitschen» spera Elena Stucki che Narvik 2029 daventi era realitad. En trais onns è quai il lieu dal campiunadi mundial «grond», quel da l'elita.