La Svizra è partida optimal al campiunadi mundial dal mountainbike a Les Gets en la Frantscha. L'equipa giuvna cun il leader Nino Schurter ha gudagnà aur en la concurrenza d'equipa. Il sextet svizzer sa cumpona dasper Schurter da Ramona Forchini dals U23, Dario Lillo e Ronja Blöchlinger, ils giuvens Khalid Sidahmed ed Anina Hutter da Trimmis.
La giuvna grischuna Anina Hutter ha surdà cun in'avantatg da 7 secundas sin l'Italia a l'auter Grischun Nino Schurter, ch'ha malgrà ina roda platta, anc cuntanschì sco emprim l'arrivada.
Argient gudogna l'Italia (+0:06 min.) e bronz ils Stadis Unids (+0:14 min.). La Frantscha, il defensur dal titel, ha stuì sa cuntentar cun il 5avel plaz (+1:35 min.).
L'equipa svizra returna pia in onn suenter ses 5avel plaz a Val di Sole enavos sin il podest. Per la Svizra èsi gia la 7avla victoria en la concurrenza d'equipa, l'emprim dapi il 2019.
