La Svizra ha in'ulteriura medaglia, e quai gist ina dad aur. Sur la distanza da 10'000 meters daventa Dominic Lubalu campiun europeic. El ha gudagnà cun in avantatg da 16 tschientavels sin il Franzos Yann Schrub. Bronz a fatg il Spagnol Thierry Ndikumwenayo. Per Dominic Lobalu èsi il segund plaz da podest tar quest campunadi europeic – suenter far bronz sur 5'000 meters.
Annik Kälin fa plaz 6
En la concurrenza da siglir lung a Roma è la Grischuna Annik Kälin siglida sin plaz 6. Cun in sigl sin 6 meters ed 82 è Kälin bain sa qualifitgada, per siglir trais ulteriuras giadas cun las meglras otg. Da sa meglierar n'èsi lura dentant betg gartegià ad ella. Campiunessa europeica dal siglir lung è daventada la Tudestga Malaika Mihambo. Quai cun in fitg ferm sigl sin 7 meters e 22.
Mujinga Kambundji fa aur
La Bernaisa da bainbaud 32 onns defenda il titel sur 200 meters cun success. Igl è però stà cnap: A la fin ha Mujinga Kambundji anc gì in avantatg dad 1 tschientavel. Per currer ils 200 meters ha ella duvrà 22,49 secundas ed è cunquai stada uschè sperta sco anc mai durant questa stagiun. Segunda è vegnida Daryll Neita da la Gronda Britannia. La Fronzosa Helene Parisot 22,63) ha cumplettà il podest.
Igl è la 9avla giada che Mujinga Kambundji è curra sin il podest ad ina occurrenza gronda. En pli è ella la suletta Svizra ch'è campiunessa europeica dubla.
Annik Kälin «siglia» en il final
Annik Kälin ha dumagnà mardi la qualificaziun per il final dal sigl en lung al campiunadi europeic d'atletica leva a Roma, e quai senza problems. Gia cun la segund'emprova è l'atleta grischuna siglida sin 6 meters ed 83 centimeters ed è daventada segunda da la qualificaziun. Ina medaglia para realistica, tant pli che Kälin ha ditg en in'intervista cun SRF ch'in sigl sin 7 meters saja pussaivel baud u tard. Il final dal sigl en lung è damaun.
3 ulteriuras medaglias
Al campiunadi europeic d’atletica leva a Roma hai glindesdi saira dà trais ulteriuras medaglias per la Svizra. Tar il umens ha il Genevrin Timothé Mumenthaler gudagnà sensaziunalmain aur sur ils 200 meters. Quai en 20,28 secundas. Bronz ha gudagnà il Grischun William Reais en 20,47 secundas. Tranter ils dus Svizzers è sa classà il Talian Filippo Tortu.
Curt avant ha gia Angelica Moser procurà per ina sensaziun: la Turitgaisa è daventada campiunessa europeica da sigl cun l'asta. Ella è sursiglida 4,78 meters – ed ha uschia egualisà il record svizzer da Nicole Büchler dal 2016. Moser è pir la terza Svizra insumma ch'ha gudagnà la medaglia d'aur ad in campiunadi europeic en il liber. Suenter il quart di a Roma ha la Svizra uss gia gudagnà set medaglias – uschè bleras sco anc mai.
La grischuna Annik Kälin: heptatlon
Annik Kälin ha finì las occurrenzas als campiunadis europeics cun in resultat che fa sa legrar, ma il medem mument er trumpà. En tut 6'490 puncts ha l'atleta da heptatlon, pia la concurrenza da set disciplinas, cuntanschì a Roma – quai è la terz meglra prestaziun da sia carriera. Tuttina n'hai gist betg tanschì per ina plazza sin il podest. Ella ha finì sin plazza quatter. Als campiunadis europeics dal 2022 aveva Kälin gudagnà bronz.
Cumenzà aveva ella l'emprim di ferm cun la cursa d'obstachels da 100 meters. Mo 13,14 secundas aveva la sportista duvrà, quai è il meglier temp da tut las atletas da quest onn. Tar la disciplina sigl en aut ha ella stuì sa cuntentar cun 1,71 meters – sia meglra prestaziun fin uss èn 1,81 meters. Pervia da problems cun ils schanugls n'èsi dentant betg stà ina surpraisa ch'ella n'ha betg cuntanschì lez resultat.
La culla aveva l'atleta da 24 onns pudì stuschar 13,61 meters. Quai resultat ha ella laschà notar suenter duas emprovas. En la concurrenza da Götzis en l'Austria avant 3 emnas aveva Kälin cuntanschì 14,33 meters. La davosa disciplina da l'emprim di era la cursa da 200 meters: lezza aveva Kälin absolvì en 23,96 secundas.
Quatter medaglias svizras
- Ditaji Kambundji ha gudagnà argient sur ils 100 meters obstachels tar las dunnas.
- Tar ils umens ha Jason Joseph gudagnà bronz sur ils 110 meters obstachels.
- En il siglir lung ha Simon Ehammer – ch'ha 24 onns – medemamain gudagnà la medaglia da bronz. Il sportist da l'Appenzell aveva gia il venderdi fatg grond'impressiun a la concurrenza cun ses sigl a lung. En mo in'emprova aveva el cuntanschì 8,41 meters.
- E sur ils 5'000 meters ha Dominic Lobalu er gudagnà bronz.
Ulteriurs resultats d'atlets svizzers
- Mujinga Kambundji manchentà cleramain ina medaglia sur ils 100 meters. En il final ha la Bernaisa stuì sa cuntentar cun l’otgavel ed ultim plaz. Aur ha gudagnà la Brita Dina Asher-Smith en 10,99 secundas.
