Che la furma da Cédric Follador constat, ha el mussà dacurt tar las cursas da la cuppa mundiala da bob ad Altenberg en Germania. En il bob da dus ha el pudì festivar ses meglier resultat da la carriera. Ensemen cun il stumplader Luca Rolli è el vegnì quart. Tar il campiunadi mundial a Winterberg vul il pilot engiadinais cuntinuar cun questa prestaziun.
La bobera a Winterberg plascha
Suenter il campiunadi mundial da bob l’enviern passà a San Murezzan spetga gist anc ina giada in campiunadi en ina regiun che Cédric Follador preferescha. Sin la bobera da Winterberg en la Germania ha il pilot gia mussà bunas prestaziuns cun il bob da quatter. Il medem duai uss er gartegiar cun la schlitta pitschna, il bob da dus. Sper il fatg che la bobera a Winterberg plascha a Cédric Follador, è er la concurrenza sezza insatge per il pilot engiadinais. Ina da sias fermezzas è ch'el sa ir fitg constant cun il bob. Sche quai reussescha sur quatter cursas, sco quai è dad absolver tar ina cursa dad in campiunadi mundial, lura è bler pussaivel.
Rinforzà en il bob da dus, magari in zichel indeblì en il bob da quatter
Cédric Follador ha ses agen team. Per concurrenzas grondas dentant decida la federaziun Swiss Sliding tgi che sesa cun el en il medem bob. Uschia ha el pudì profitar da Luca Rolli ch’è per quest campiunadi mundial ses stumplader. Perquai ha el stuì dar giu sco pilot da la schlitta gronda, dal bob da quatter, in da ses buns stumpladers. Cédric Follador constatescha uschia ch'el è vegnì rinforzà en il bob da dus ed in zichel indeblì en il bob da quatter.
