Als campiunadis mundials da snowboard a Bakuriani en la Georgia datti aur ed argient per la Svizra. Julie Zogg da Walenstadt è la nova campiunessa mundiala dal slalom parallel. Ella batta en il final la cumpatriota Ladina Jenny da Glaruna per 26 tschientavels. Il podest cumplettescha l'Austriaca Sabine Schöffmann.
Nagina medaglia per ils umens
Dario Caviezel da Cuira perda il quartfinal cunter Arnaud Gaudet dal Canada. Il snowboardist da 27 onns, ch'ha gudagnà la dumengia argient en il slalom gigant parallel, ha tutgà ina porta cun il maun ed è cupitgà perquai. Er sch'el ha pudì ir vinavant na ha el betg pli seguir ses concurrent. Er l'auter Svizzer, Gian Casanova, na vegn betg vinavant.
Ils Austriacs festiveschan ina victoria dubla, Andreas Promegger batta en il final Arvid Auner, Bronz va ad Arnaud Gaudet da la Frantscha.
