William Reais da Cuira resta il meglier sprinter svizzer. El ha gudagnà a Winterthur il sprint da 100 meters en in temp da 10,26 secundas ed uschia defendì ses titel dal 2023. Silsuenter ha Reais er gudagnà aur en il sprint da 200 meters, sco gia il 2020, il 2022 ed il 2023. En halla ha el gudagnà quest titel sur la distanza da 200 meters dal 2018 fin il 2021.
Tar las dunnas ha Mujinga Kambundji gudagnà il sprint da 100 meters, quai en in temp da 11,01 secundas.
Kälin dubla campiunessa svizra
Er persvadì als campiunadis svizzers d'atletica leva a Winterthur han las sportistas grischunas. Annik Kälin da l’uniun da gimnastica Landquart è vegnida gist duas giadas campiunessa svizra. La heptatlonista ha gudagnà aur tant en il siglir lung sco er en il sprint da 100 meters sur obstachels.
Ina medaglia hai er dà per Selina Capaul dal BTV Cuira. Sco atleta U20 ha la sportista da Domat gudagnà bronz en trair la lantscha. Suenter in titel da campiunessa svizra en la categoria U16 e dus titel en la categoria U18 ha Selina Capaul uschia gudagnà sia emprima medaglia tar las activas.
Persvadì ha er Stella Derungs dal TV Landquart. Ella è currida il sprint da 100 meters sur obstachels en in temp da 14,12 secundas ed uschia dumagnà la qualificaziun per ils campiunadis mundials da las junioras sut 20 onns.