Siglir tar il cuntegn

Header

audio
CB Trun/Rabius sto tschertgar novs trenaders per l'equipa da 3. liga.
Or da Actualitad dals 23.03.2022.
laschar ir. Durada: 3 minutas 32 Secundas.
cuntegn

CB Trun/Rabius Duo Albin e Vincenz chala da trenar

Il Club da ballape Trun/Rabius sto puspè ir a la tschertga da novs trenaders. Suenter mo trais stagiuns han Donat Albin e Philippe Vincenz abditgà sco trenaders da l’emprima equipa che dat en 3. liga.

La raschun saja la mancanza da temp, di Donat Albin. Il ballape custia enorm bler temp e suenter trais stagiuns saja temp dad puspè avair dapli temp per tut quai che saja vegnì a la curta ils davos onns, ed er per sa focusar sin novas chaussas, novs interess. I n’haja da far nagut cun l’equipa. Anzi, els hajan fitg bun entaifer l’equipa e giaudian mintga mument ensemen, uschia Albin.

Anc nagins successurs

Donat Albin e Philippe Vincenz avevan surpiglià communablamain il post da trenader tar l’emprima equipa dal CB Trun/Rabius la stad 2019. Uss sto la suprastanza ir a la tschertga da novs trenaders. Tenor il president Otto Beer na dettia anc nagin successur. La suprastanza giavischassia dentant, sco enfin uss, puspè dus trenaders.

equipa CB Trun/Rabius
Legenda: Il CB Trun/Rabius sto ir a la tschertga da novs trenaders per l'equipa da 3. liga. RTR, Andreas Wieland

Equipa ha success

Suenter la runda d’atun, pia suenter la mesadad dal campiunadi, sa chatta il CB Trun/Rabius sin il 7avel plaz – amez la tabella – ed uschia in brav toc davent d’ina plazza da relegaziun. La sonda (26 da mars) cuntinuescha il campiunadi cun la runda da primavaira. Il CB Trun/Rabius frunta en l’emprim gieu da 3. liga ordaifer sin il FC Tusaun-Cazas ch’ha cun 18 puncts suenter ils emprims 11 gieus gudagnà be in punct dapli ch’ils Sursilvans.

Actualitad 11:00

Artitgels legids il pli savens