Genevra-Servette scriva istorgia da hockey. Sco emprima equipa svizra triumfeschan els e gudogna^n il titel da la Champions Hockey League. Avant 15 onns, cura ch'ils ZSC Lions han gudagnà la curuna dal hockey europeic eran il format ed il modus auters, sco era l'organisatur.
Avant 10 onns è la Champions Hockey League vegnida instradada da nov. Dapi lura èn ils victurs adina stads clubs da la Svezia u da la Finlanda. Cun lur victoria da 3:2 encunter ils Svedais da Skelleftea termineschan ils hockeyans da Genevra-Servette questa dominanza scandinava e prendan plaz sin il tron sco meglra equipa da hockey da l'Europa.
L'equipa dal trenader Jan Cadieux ha gist al cumenzament dal gieu surpiglià il dictat e giugà curaschus e svelt. Persvadì ch'i gartegia da realisar insatge grond per il club, per ils fans, ma era per il hockey svizzer. Gia en la 6avla minuta sajetta Eliot Berthon il 1:0. Be paucs minutas suenter egualiseschan ils Svedais da Skelleftea.
Encunter la fin da l'emprima terz nizzegia Genevra-Servette gist dublamain il powerplay suenter ch'in giugadur adversari ha stuì prender plaz sin il banc da chasti. En la 18avla minuta sajetta Sakari Manninen il 2:1 per Servette. E gnanc ina minuta pli tard croda il 3:1 entras Daniel Winnik. Cun ina prestaziun solidarica han ils campiuns svizzers defendì senza problems quest avantatg en il segund terz. En l'ultim terz vegn Skelleftea da scursanir al 2:3. Tge che ha procurà per in pau hectica e tremblar en la fasa finala. In grondius Jussi Olkinoura en il gol dals Genevrins ha impedì ch'ils Svedais vegnan anc d'egualisar la partida da final. Genevra-Servette gudogna meritadamain, cun tactica ed era disciplina il titel da la Champions Hockey League.
Il final da la Champions Hockey League è stà en il stadion Les-Vernets a Genevra. Entaifer be 6 minutas èn tut ils bigliets stads vendids (7'135 aspectaturs). Genevra-Servette po uschia quintar cun il grond sustegn da ses fans.
Ina surpraisa
En la Champions Hockey League aveva Servette giugà 6 giadas a chasa ed è adina ì sco victur giu dal glatsch. Ma era l'adversari en il final ha gì ina statistica impressiunanta. Skelleftea ha en ses 6 gieus ordaifer be pers in. Ils Svedais èn arrivads a Genevra cun la confidenza d'avair gudagnà 4 da las ultimas 5 partidas.
Che Genevra-Servette ha insumma cuntanschì il final da la Champions Hockey League è percunter stà ina surpraisa. En il campiunadi svizzer na pon ils Genevrins betg persvader. 6 gieus avant la fin da la qualificaziun è il defensur dal titel sin l'8avel plaz e sto probabel prender la via sur la runda da Play-In per cuntanscher ils playoffs.
Fin l'onn passà ha Genevra-Servette strusch gudagnà insatge sin il glatsch. Lura ha il club romand triumfà en il final dal playoff ed è daventà campiun svizzer. Emblidar la furma en la National League e persvader sco fin uss en quella campagna europeica, è stà la devisa per il trenader Jan Cadieux da ses giugaders.
Gudagnar il final è stà ord vista sportiva in triumf prezius per Genevra Servette. Finanzialmain dentant definitiv betg. Per cumparegliar: L'onn 2009 han ils ZSC Lions incassà 2,5 milliuns francs per lur victoria en la Champions Hockey League. Dapi il nov format datti anc 360'000 francs per il club victur.