Siglir tar il cuntegn
Larissa Tschenett
Legenda: Larissa Tschenett sin buna via da far carriera cun il velo da cursa. rmv-chur.ch

Ciclissem Larissa Tschenett al «Tour de Suisse Féminin»

Per la terza giada sa participescha Swiss Cycling al Tour de Suisse cun in’equipa naziunala da dunnas. La ciclista la pli prominenta en l’ensemble dal trenader naziunal Edi Telser è la campiunessa olimpica da mountainbike Jolanda Neff. Er a la partenza dastga ir la Grischuna Larissa Tschenett.

audio
Larissa Tschenett: «Jau ma legrel fitg e quai è propi cool»
ord Actualitad dals 13.06.2024. Maletg: cyclingteamost.ch
laschar ir. Durada: 4 minutas 18 Secundas.

Per Larissa Tschenett èsi ina premiera e franc in dals puncts culminants en sia anc giuvna carriera. La sportista da la Val Müstair che lavura dentant a Cuira, quai en in pensum dad 80% sco cussegliadra da persunal, e che fa er part al RMV Cuira sco er al Cyling Team Ost valia sco ina da la grondas speranzas per l’avegnir cun grond potenzial, uschia Swiss Cycling.

Dasper Larissa Tschenett e Jolanda Neff fan anc part al team da Swiss Cycling Lea Fuchs, Steffi Häberlin, Lorena Leu e Jasmin Liechti. Cun Elena Hartmann po anc ina segunda rumantscha ir a la partenza. La ciclista oriunda da Domat che viva dentant en il chantun Zug parta per sia equipa svizra Roland.

audio
Larissa Tschenett ha barattà la palutta da tennis cun il velo
ord Actualitad dals 13.06.2024. Maletg: RTR
laschar ir. Durada: 4 minutas 53 Secundas.

Il Tour de Suisse Féminin cumenza la sonda, ils 15 da zercladur a Villars-sur-Ollon. I spetgan quatter etappas che mainan quest onn tras la Svizra franzosa. Sco grond trumf svizzer parta Elise Chabbey da Genevra. Betg a la partenza è percunter Marlen Reusser ch'aveva gudagnà l’onn passà il classament general. Reusser è malsauna e na po uschia betg defender sia victoria dal 2023.

RTR Novitads 14:00

Artitgels legids il pli savens