Il Canadais Joseph Morrow gioga da nov tar il HCD, e quai almain fin la fin da la stagiun, scriva il Club da hockey Tavau. L'um da 30 onns mida dal HK Sotschi che gioga en la liga da hockey continentala (KHL) en Russia. Avant era el tar differents clubs da la NHL. Il sustegn dovra Tavau perquai che trais defensurs, Jung, Nygren e Wellinger crodan ora pervi da blessuras.
Aaron Irving remplazza Magnus Nygren
Gia la fin da schaner ha il Club da hockey da Tavau reagì sin la ferida da Magnus Nygren. Il defensur canadais Aaron Irving ha suttascrit in contract fin la fin da la stagiun. Il giugader da 26 onns ha giugà fin ussa tar il club finlandais Liiga-club Saipa. Là ha el fatg questa stagiun tschintg gols e dà 23 assists en 42 gieus.
Sco ch'il club da Tavau scriva, vegnia il Canadais a viagiar directamain a Tavau cura ch'el survegnia il visum. Il HCD dovra urgentamain in rinforzament defensiv. Magnus Nygren ha numnadamain rut l'emna passada la stgaina e l'oss dal ventrigl cun quai è sia stagiun finida. Er Sven Jung na vegn betg pli a giugar questa stagiun pervi d'ina blessura vi dal bratsch.
