Lorena Cadalbert è partida cun il numer 57 ed ha gia sin l’emprima runda pudì surpassar concurrenta per concurrenta. Silsuenter ha ella adina tegnì in plaz sut las top 25. La finala ha Lorena Cadalbert, ina da las pli giuvnas insumma a la partenza, pers 6:28 minutas sin la campiunessa mundiala franzosa Line Burquier.
Franzosas han procurà per la musica
Sco gia en la cursa da staffetta han las Franzosas er dà en il tun en la cursa da las junioras. Sut las emprimas quatter èn classadas gist trais mountainbikeras franzosas. Campiunessa mundiala è vegnida la favurita Line Burquier. Meglra svizra è stada Lea Huber sco 5aval cun in retard da bunamain duas minutas.
Emprima medaglia per la Svizra
En la cursa da cross country dals juniors sut 19 onns hai dà l'emprima medaglia per la Svizra al campiunadi mundial da mountainbike a Val di Sole. Il Bernais Nils Aebersold ha gudagnà bronz. Campiun mundial è daventà il Franzos Adrien Boichis. El è stà passa ina minuta pli svelt ch'il Columbian Camilo Andres Gomez che gudogna argient. Nils Aebersold ha pers 1:21 minuta sin il Adrien Boichis ch'ha procurà per la terza medaglia d'aur per la Frantscha en la terza cursa.